Nagaland hmaah Mizoram

Ranji Trophy khelh mekah Mizoramin hneh loh an la tawng lo a, vawiin hian an match hnuhnung berah Plate group hmahruaitu Nagaland an hmachhawn ang. Match khat hi ni li chhung khelh tur a ni a, Mizoram inkhelhna tur hi khawvel huap pawha cricket ground ngaih hlut Eden Gardens, Kolkata a ni.

Plate group-ah hian team paruk an awm a, team pakhat chiahin knockout stage an luh dawn avangin Mizoramin chak loh la nei lo mah se point hnih chauh an la hmuh avangin beisei tur an nei tawh lo. Chutihrualin an khingpui Nagaland tan group stage paltlang turin Mizoram hneh a tawk a, pahnihnaa awm Manipur erawh Mizoram kutah an innghat thung.

Mizoram hian match hmasa berah Bihar an chelh a, state pawn player Taruwar Kohli che ṭhain innings vawi hnihah century a siam ve ve. Mizoram captain Kohli hi state pawn player Uday Kaul leh Iqbal Abdulla ten an thlawp ṭha bawk.

Manipur an chelh ṭum pawhin Mizoram tan Kohli, Kaul leh Abdulla te bawk an che ṭha a, top order lama awm Vikash Kumar (26), Lalhruaizela (11) leh Remruatdika (12) ten run 10 an siam tling bawk.

Nagaland laka result ṭha nei leh turin khaw tual player an pawimawh dawn a, batter tan run siam tam loh pawhin ball hmachhawn tam te a ṭul ang. Match hmasa pahnihah ball man ngei tura ngaih man loh te a awm a, tihsual an tih tlem hret hret theih chuan Mizoram tan Nagaland chelh hi thil theih a ni.

Nagaland hian state pawn player an nei ṭha a; Shrikant Shrihari Mundhe, Chetan Dinesh Bist leh Rongsen Jonathan te chu buaipui tham an tling dawn. Nikum December thla khan Vijay Hazare Trophy (One Day)-ah Nagaland hian Mizoram hi 80 runs in an hneh.

Team pahnih inkhelh tawhna leh tun inelnaa an result thlirin Mizoram hian an chelh thei a nih chuan result ṭha a ni ang.