Djokovic leh a coach inṭhen

Novak Djokovic chu hun rei tak a lo thawhpui tawh a coach Marian Vajda nen an inṭhen, anni pahnih hi ṭum hnih an thawk dun tawh–tun ṭum hi vawi hnih an inṭhenna tihna a ni.

Serbian star hian tun kar aṭangin world number 1 a nihna chu Daniil Medvedev lakah a chân. Ranking lama a tlak hniam chhan hi result neih ṭhat loh ai chuan Covid-19 vaccine lak loh vanga a inkhelh tam loh vang niin a lang.

Grand Slam vawi 20 champion tawh Djokovic hi senior huanga inelna a hmachhawn ṭan dawn khan Vajda nen hian an thawkdun, mahse kum 2007 khan an inṭhen. Tun ṭuma an thawhdunna erawh kum 10 chuang lai a ni thung.

Kum 34 mi Djokovic chuan, "Marian hian ka tennis zinkawngah hmun pawimawh tak a chang. Kan pahnih hian hlawhtlinna tam tak kan chang dun, tun hnai kum 15 chhunga ka tana a hun hmante avangin lawmthu ka sawi," a ti.

Djokovic hian vaccine a la la lo chhunzawm zel. Ram ṭhenkhat chuan vaccine la lo tan an rama luh an phal loh bakah harsatna a awm ṭhin, chuvangin engtiangin nge season a hman chhoh dawn hriatthiam a la harsa hle.