Jamshedpur tan semifinal a chiang ta

Season ṭantira rinhlawh zingah tel lo mah se Jamshedpur FC-in semifinal an khel dawn tih a chiang ta a, Men of Steel hian Thawhlehni zan khan Hyderabad chu 3-0 in an hneh.

Jamshedpur tan hian Chinglensana Singh (own goal), Peter Hartley leh Daniel Chima Chukwu te chuan goal khat ṭheuh an khung a, Hyderabad-in a chhanletna tur an neih loh avangin an mualpho.

ISL-ah semifinal khel turin Hyderabad leh Jamshedpur an tling chiang ta tihna a ni a, hmun ruak pahnih a la awm mek. Nizan khan semifinal beisei zinga mi Kerala Blasters leh Mumbai City an inkhel a, result kan hre hman lo.

Zanin dar 7:30-ah ATK Mohun Bagan leh Chennaiyin an inkhel dawn a, Kolkata club tan semifinal khel turin point khat bak hmuh a ngai tawh lo.

Men of Steel
Jamshedpur-in semifinal khel turin point khat lek an mamawh tawh tih an inhria a, minute ngana lekah goal an khung ṭan–midfielder Mobashir Rahman-a shot chuan Chinglensana a per a, goal-ah a lut.

JFC goal khung hnuah Hyderabad an harh zawk a, ball an chang tam zawk. Mahse, Mizo tlangval Ricky Lallawmawma leh Laldinliana Renthlei awmna Jamshedpur tlarhnung an nghing duh lo a, goal khungtu chu JFC bawk an ni.

Minute 28-naah Alex Lima corner aṭanga ball kal chu Hartley chuan a tauh lut a, Brazilian midfielder Lima hian minute 65-naah Daniel Chima khung tur a siamsak leh bawk. January-a East Bengal aṭanga JFC pantu Daniel hian Men of Steel tan match sarihah goal nga a khung tawh.

Nigerian striker goal khung aṭanga minute thumnaah JFC midfielder Mobashir chu Akash Mishra laka a chet mawi loh avangin hnawhchhuah a ni a, inkhel result erawh a nghawng phak tawh lo.

Mizo tlangval
Jamshedpur-in match hnih khelh tur la nei chungin league table chung ber an luah mek a, tun dinhmun an thlen theih nan Dinliana leh Ricky ten an thawhhlawk hle.

Mizo fullback pahnih hian league match 18 an khelh tawh chu an khel kim vek a, JFC tlarhnung tana an ṭangkai tluk zetin goal nawr kawngah pawh an thawhhlawk dun hle–ISL-a fullback inkawp fuh bera chhal ngam an ni.

Ricky hian, "Season ṭantirah chuan kan beisei ngam chiah lo a, tunah chuan kan inringtawk tawh khawp mai," tiin champion beiseina an neih thu Vanglaini a lo hrilh tawh a, a awm lo hran lo.

Hyderabad tan Mark Zothanpuia chu bench aṭanga luhtir a ni bawk a, Serchhip rawlthar hi season hmasa khan senior squad-ah awm tawh mah se tun season hi ISL-a a inlan vawi khatna a ni–match thumah luhtir a ni ve tawh.