AC Milan leh Inter inhnehtawk

Serie A champion tuma in um lai AC Milan leh Inter Milan te Coppa Italia-ah an intawng a, semifinal first leg inkhelah goal a lut lo. April 20, Nilainiah second leg khelh leh a ni ang–Inter chu mualneitu an ni ve thung tawh ang.

Thawhlehni zan inkhel ṭan hmain Milan leh Ukraine legend Andriy Shevchenko hnen aṭanga thuchah tih lan a ni a, an rama indona tihtawp a duh thu a ni, "Italian ṭhiante u, remna leh muanna a awm theih nan in aw chhuah rawh u," a ti.

Nizan khan semifinal lehlamah Juventus leh Fiorentina an inkhel a, result kan hre hman lo. Ruahman dan chuan final hi May 11-a khelh tur a ni dawn, hripui leng leh buaina dang avang erawh chuan tih danglam leh theih a la ni ang.

Goal a lut lo
San Siro-a inkhelah tun hnaia che fuh tawk lo Inter an fimkhur a, goal khung aiin a venhim chu an ngaih pawimawh hmasak zawk a ni. Milan chu hun ṭha nei hnem zawk niin, forward Theo Hernandez-a'n goal ban hrulah a pet chhuak.

Rafael Leao khung tur pawh Inter Milan keeper Samir Handanovic chuan ṭha takin a lo dansak. Mikhual chan chang Inter striker Edin Dzeko pawhin goal khung theihna remchang vawi hnih a nei, mahse Ivan Perisic-a cross a tauh luh tur chu Alessio Romagnoli-a'n a lo dang hram.

Tun hnaiah Lautaro Martinez ke a hmui tawk lo, Argentine forward hian Milan tlarhnung a su hawng hleithei lo. Chak zawk awm lo mah se Inter tan Joaquin Correa lo kir leh ta kha a lawmawm ang, hliam vanga thla hnih a chawlh hnuah khelmual a rap ve leh ta a ni.

Serie A champion Inter hi tun hnai an match pangaah chak ni hmel an hmu lo, season chawhnu lam an hman danah hmasawn an ngai. An elpui Milan pawh inelna hrang hrang match hnuhnung pathumah chak an nei lo, hmasawn an mamawh dun hle.

Chak phu Milan
AC Milan manager Stefano Pioli chuan inkhel pumpui thlirin chak phu zawk an nih thu a sawi, goal khung loa inhnehtawk chu an tan result chhia a nih loh thu a sawi bawk–second leg khelh a huphurh hran lo.

Italian manager Pioli chuan, "Chak phu zawk kan ni a, chak zawk kan awm lo erawh result ṭha pangngai chu a ni tho. Second leg khelh tur a la awm, inkhelh vawi hnihnaah chuan mikhual zawk kan ni tawh dawn, goal kan khung a nih chuan Inter tan a harsat sawt ang.

"Tun hnai kum hnih leh a chanve chhung hian kawng hrang hrangin hma kan sawn, kan hmasawnna nemnghet tur erawh chuan nomawi eng emaw ber kan chawi a ngai, chumi tur chuan match khelh hmabakah che sual loa khelh a pawimawh," a ti.

Milan hian tun kar tawpah Serie A match khel turin Napoli an zin chilh dawn. Napoli hi league hmahruaitu an ni mek a, pahnihna Milan nen an point hmuh a inzat thung–inkhel result hian hmahruaitu a la thlak danglam leh thei ang.

Harh ngai Inter
Inter Milan hi minute 403 chhung goal khung loin an awm ta. Manager Simone Inzaghi chuan an rilru leh taksa a chauh thu a sawi a, thla khat chhung deuh thaw chak ni hmel an hmuh loh avangin eng emaw siamṭhat ngai chu an nei tih a chiang.

Inzaghi chuan, "Milan Derby ni mah se rin ai takin boruak a sosang lo, team pahnih khan minute 180 khelh tur a ni tih kan hriat chian vang pawh a ni mai thei, second leg-ah chuan chak tumin kan bei ngawrh zual dawn.

"Tun ṭuma kan inkhelh hi season kal laia match 36 kan khelhna a ni a, taksa leh rilru chu a chau tih phat tur a awm lo. Season tir lamah kan hriamna ang kha nei let leh turin intah hriam thar erawh a pawimawh hle," a ti.

Inter hian Zirtawpni zanah table mawngphah luahtu Salernitana an mikhual dawn a, kar lehah Champions League last 16 second leg khel turin Liverpool an tlawh ang. Reds lakah hian 2-0 a an hniam mek avangin an hna a hautak tawh dawn hle.

Player Inlan:
Milan: Maignan; Florenzi (Calabria 84), Tomori, Romagnoli (Kalulu 26), Theo Hernandez; Kessie, Bennacer; Saelemaekers (Rebic 67), Krunic (Brahim Diaz 67), Leao (Messias 67); Giroud.

Inter: Handanovic; Skriniar, De Vrij, Bastoni; Dumfries (Darmian 88), Barella (Vidal 65), Brozovic, Calhanoglu, Perisic (Gosens 88); Lautaro Martinez (Alexis Sanchez 65), Dzeko (Correa 79).