Russian driver tan 'Neutral' nih a ngai

Motosports huanga thuneitu Federation Internationale de l'Automobile (FIA) chuan Ukraine laka Russia chet dan chu a dem. Formula 1 huangah Russian leh Belarusian driver te chu an ram hmingin an inlan thei dawn lo, neutral an nih a ngai dawn.

FIA hian tun season atan Russian GP chu an lo ṭhulh fel tawh bawk. President Mohammed ben Sulayem chuan, "Russia chet dan hi kan dem. International Olympic Committee nena inremna angin Russia chungah thutlukna kan siam a ngai," a ti.

F1 thuneitu lam thutlukna avang hian Russian driver Nikita Mazepin chu car intlansiakna sang berah a inlan thei dawn a, a team Hass tan driver dang zawn buai a ngai rih lo ang–mahse an ram hming a tih lan a rem dawn lo.

Tun kar tir lam khan F1 driver hlui Daniil Kvyat a lo ṭawng chhuak tawh a, infiamna peng hrang hranga Russia an hrekna chu mak a tih thu a sawi. Kvyat chuan, "Infiamna chu politics tel lo ni rawh se," tiin a lo sawi tawh.