Real Betis dinhmun a ṭha

Copa del Rey semifinal second leg khel turin Rayo Vallecano chuan zanin dar 1:30 hian Real Betis an lenchilh dawn a, mualneitu Betis dinhmun a ṭha zawk.

Manuel Pellegrini hnuaia season duhawm tak hmangtu Betis hian first leg-ah 2-1 in hnehna an lo chang tawh a, zaninah mahni muala khel tur an nih bawk avangin fan-ten tlang an inbeisei ang.

Betis hian hliam vangin defender Martin Montoya leh Juan Miranda te an la chhawr thei dawn lo a. midfielder Victor Camarasa pawh a la chawl mek.

Mahse, La Liga table-a pathumna ni mek team hian defender Marc Bartra, Alex Moreno leh Héctor Bellerín te ho an nei a, midfielder Sergio Canales, William Carvalho leh Guido Rodríguez te pawh Rayo tan chuan an ṭha hret mai thei.

Tlarhmaah tun season match 33 aṭanga goal kua leh assist pasarih nei tawh Nabil Fekir, match 30-a goal 16 leh assist vawi hnih neitu Juanmi, match 36-a goal 13 leh assist vawi hnih neitu Borja Iglesias leh match 30-a goal 10 leh assist panga neitu Willian Jose te ho an nei a, an ṭha ṭhe ṭhaw hle.

Inelna hrang hranga an match hnuhnung pangaa la tlawm vek Rayo tan hna a harsa dawn tih a chiang a, an match hnuhnung bera Real Madrid laka khel ṭha tak, Zinedine Zidane-a fapa goalkeeper Luca Zidane tan chet sual a thiang dawn lo.

Radamel Falcao-a'n duhawm takin season bul ṭan mah se November hnuah a inlan leh tawh lo a, tun season-a match 25 a khelh aṭanga goal nga leh assist vawi hnih nei tawh Sergi Guardiola tan mawhphurhna a sang leh dawn tihna a ni.

Rayo hian Manchester United-a lo hlawhchham tawh Bebe kha an kawl a, Portuguese midfielder hian Spanish club-ah hian hmun pawimawh a chang.

Attacking midfielder Oscar Trejo hian match 28-ah goal li khunga assist vawi kua a neih theih avangin en bik a hlawh ngeiin a rinawm a, Rayo beiseina siamtu a ni thei ang.

Copa del Rey Semifinal
First Leg
February 9, Nilaini Zan
Rayo Vallecano 1–2 Real Betis
RAY: Alvaro Garcia 5'
REB: Borja Iglesia 26'; William Carvalho 68'
February 10, Ningani Zan
Athletic Bilbao 1–1 Valencia
ATH: Raul Garcia 37'
VAL: Hugo Duro 65'

Second Leg
March 2, Nilaini zan
(Result kan hre hman lo)
Valencia 2:00 AM Athletic Bilbao
Zanin Inkhel Tur
Real Betis 1:30 AM Rayo Vallecano
*Away goal rule hman a ni lo