Goal hmanga damna puangtu Vardy

Jamie Vardy a lo kir a, kumina a vawi khat nan Leicester City an chak nghal. English striker hian goal khat a khung bakah James Maddison khung tur siamsak bawkin Burnley lakah Foxes hi 2-0 in hnehna a chanpui.

Leicester manager Brendan Rodgers chuan Vardy lo kir chu an tan chanchin ṭha a nih thu a sawi a, tun hnaia che fuh hleithei lo an club tan inrintawkna siamsaktu a nih ngei a beisei thu a sawi bawk.

Vardy a dam
Malpui hliam vangin Vardy hi a chawl rei ta hle. Kumina match a khelh hmasak ber a ni a, a tirah chuan bench-ah dah ni mah se goal an mamawh avangin luhtir a ni, minute 72-naah rawn lutin danglamna a siam.

Khelmual a luh aṭanga minute 10 hnu lawkah midfielder Maddison tan a siamsak, hun tawp hma chiahin an chak nemnghehna a khung bawk. Rodgers-a naute hian kumina a vawi khat nan Premier League-ah chak ni hmel an hmu ve ta chiah a ni.

Rodgers chuan, "James leh Vardy te ang quality sang kan nei hi chu kan vannei, an goal khung leh chet vel dan kha en ula, thil ropui dang a lo thleng leh thuai dawn tih chu in ring ngam mai ang.

"A bik takin club tana Vardy pawimawhna hi a sang, kum 35 mi ni tawh mah se a thahrui chak tak hi a la danglam lo. Player dangte chawk phurtu leh huaisenna petu a ni," tiin a player a dahsang thian hle.

Burnley an buai
Sean Dyche-a enkawl Burnley hi Premier League team hmuhnawm leh hmachhawn harsa an ni ṭhin. Mahse, tun season-ah erawh an che fuh hleithei lo–English football inelna sang ber khelh chhunzawm an duh a nih chuan a rang thei ang bera insiamṭhat an ngai dawn.

Burnley manager Dyche chuan, "Goal kan chhuah dan kha a ho angreng hle, inven theih reng ni anga chet sual hi chu a pawi bik ṭhin. Vardy rawn lut khan nasa takin boruak a thlak danglam, lehlam an phur zual avangin keini lam kan chiai ve rinngawt niin a lang.

"A nihna tak sawi chuan tunah hian thih leh dam kara leng kan ni. Chutihrualin dinhmun siamṭha turin hun kan la neiah ka ngai, match khelh hmabak 13 kan la neih hi a ṭha thei ang bera hman kan tum ang," tiin a sawi.

Burnley hi tlahniam thei chinah an la awm chiah, an chunga awm Everton aiin an hniamna chu point khat chauh a ni. Mahse, match khatin an khel hnem zawk. Premier League table thlir mai chuan 10-na Brighton thlengin an him tia sawi ngam an la ni lo.