Chhinga Veng hnehtu RVL

Mahuma Memorial 1st Division Screening Tournament 2021-22 khelh laiah Ramhlun Venglai an che ṭha chhunzawm. RVL hian nimin inkhelah team ṭha Chhinga Veng chu wicket thumin an hneh.

RVL hian match thum an khelh tawh chinah chak loh an la nei lo, team pariat inel zingah hma an hruai mek. Chhinga Veng, Kulikawn, Chanmarians leh Zarkawt Lords te chu vawi khat ṭheuh an tlawm tawh thung.

Nimin Suaka Cricket Ground, Sihhmuia inkhelah Ramhlun Venglai hi ṭhumvawrah an vannei zawk a, vawm hmasak an thlang. 3C lamin over 42.5 chhungin run 166 an siam, target an siam sang thei lo.

Ramhlun Venglai tan run 46 siamtu Lalhmachhuana a khel ṭha a, K. Vanrotlinga (27 runs), Lalṭhakima Khawbung (21) leh F. Lalruatfela (15) ten an thlawp ṭha bawk a, over 40.1 lekah target an khum.

Tournament hi hripui leng vangin hun rei tak chhung chawlh lailawk a ni a, tun kar aṭangin khelh chhunzawm leh a ni. Thawhlehni khan Chanmarians chuan Kulikawn lakah wicket kuain hnehna an lo chang ve tawh bawk.