Chelsea lei duh in awm em?

Nilaini zan khan Chelsea fan-ten an thu hriat châk loh ber pawl an hria a, chu chu an hmangaih Chelsea zawrh a nih thu a ni - Roman Abramovich chuan London club hi a zawrh thu a puang a, pound tluklehdingawn 3 nei tan a lei theih.

Russia-in Ukraine a run avangin khawvel hmun hrang hrang aṭangin demna thu a awm reng a, ram hrang hrangin Russia an dem karah infiamna khawvel pawhin Russia hi a tukhum pawng a hmuh mek.

United Kingdom Parliament-ah pawh Roman Abramovich chungchang sawi lan a ni a, UK ram chhunga a thil neihte khawih che thei lo tura hrek chungchang thlengin sawi rik a ni.

Abramovich hi Russia president Vladimir Putin-a ṭhianpa anga sawi a ni a, Russia hotupa thurawn pe theitu zinga mi a ni - hei vang hian UK sorkar thuneitu zingah hrem châk an awm nual a, Abramovich-a'n hrem a nih hmaa club hralh turin hma a la ta.

A na asin
Abramovich chuan, "Club tana ṭha ber tur ngaihtuah chungin thutlukna ka siam fo ṭhin a, thil thlen mek dan ngaihtuahin club hralh mai hi ṭha zawkah ka ngai a, club, fans, club hnathawkte, sponsor leh kan thawhpuite tana ṭha ber tur ngaihtuah chungin thutlukna hi ka siam a ni," a ti.

Russian sumdawng hausa hian kum 2003 khan Chelsea hi pound maktaduai 140-in a lei a, Blues a lei hnuah European football-a club lian ber pawlah a din chho a, manager 13 ngawt a thlak hman a, dollar tluklehdingawn hnih chu transfer bazar-ah a seng bawk.

Abramovich chuan, "Ka tan chuan thutlukna siam harsa tak a ni a, hetianga inṭhen a ngai ta mai tur hian min run takzet. Mahse, club tana ṭha tur ka ngaihtuah a ṭul si a ni," a ti a, Chelsea fans ruhkawl tam tak biangah mittui a luang.

Kum 55 mi Abramovich chuan, "Hmaichhan ngeiah mangṭha tia kan inthlah theih nan Stamford Bridge ka rawn tlawh leh theih ngei ka beisei a, Chelsea chhungkuaa ka awm thei kha ka lawmin kan hlawhtlinna zawng zawng kha ka chhuang takzet. Chelsea leh he club ṭantute ka thinlungah in cham reng tawh ang," a ti.

Ukraine tan
Russia-in Ukraine a run zarzoin Abramovich-a'n a club hmangaih a mangṭha a ṭul a, mahse, he sumdawng hausa hian a club a kalsan dawnah Ukraine a hre reng tih a lantir - club hralhna aṭanga hlawkna awm chu Ukraine tan a hlan dawn.

Abramovich chuan, "Ka team-te chu charitable foundation ruahman turin ka ti a, hetah hian club hralhna aṭanga hlawkna awm ang chu kan chhung lut vek ang. He kan sum hmuhte hi Ukraine indona tuartute tan hman a ni dawn a, rang taka chhawmdawlna mamawhtute leh nakin zela a nghawng turte tan hman a ni ang," a ti.

Hetihrual hian heta Abramovich thusawi hi khawthlang media-te chuan an chai leh luih luih tawh. Sum an pek tur hi a sawi angin, hlawkna chin zawng an pe dawn nge, club a puk tir, ama pawisa pound tluklehdingawn 1.5 rulh zawha la bang chu ni ang? tih leh, 'indona tuartu' tih hian Russian leh Ukrainian a huam kawp em? tihte chu an inzawhna a ni.

Abramovich hian club chu a mimal pawisa, pound tluklehdingawn 1.5 a puk tir a, "Loan hi rul turin ka ti dawn lo. Chelsea hi ka tan chuan sumdawnna a ni lo a, club leh football hmangaihna avang liau liaua enkawl ka ni," a ti.

Leitu tur
Abramovich-a hnuaiah Chelsea-in nomawi chawi theih zawng zawng an chawikim a, London club hi Champions League (2), Premier League (5), FA Cup (5), Europa League (2) leh League Cup (3), UEFA Super Cup leh Club World Cup-ah te a champion pui a, Chelsea hmeichhe team chu Women's Super League (4) leh Women's FA Cup (3) ah an champion a, season hmasa khan Champions League final an lut bawk.

Russian sumdawng hausa hnuaia an hlawhtlinna zawng zawng thlirin Chelsea fan-ten Abramovich an ui ngawih ngawih ang tih a chiang a, club leitu tur tan pawh chona a hautak dawn - tuna zawhna erawh, tuin nge lei ang? tih a ni.

Abramovich-a'n Chelsea a hralh tur thu a puan hma hian Swiss mi hausa Hansjörg Wyss chuan Blues hi zawrh a nih thu a sawi a, Abramovich-a hausakna hi dollar tluklehdingawn 13.6 a ni a, Wyss-a hausakna hi dollar tluklehdingawn 5.1 a chhut a ni thung.

Wyss hi Abramovich ang em chuan hausa lo mah se a duhnaah erawh sum a ren lem lo. Kum 2008 khan Harvard University-a Institute for Biologically Inspired Engineering din a nih theih nan dollar maktaduai 125 a lo thawh tawh.

Buaina chu
Wyss chuan, "Abramovich hian England-a a in zawng zawng hralh vek a duh a, Chelsea pawh a rang thei ang bera hralh a duh a ni," a ti a, amah bakah midang pathum chu Chelsea hi zawrh an nih thu a sawi bawk.

European Union chuan Russian mi hausa engemaw zat hrekna a tichhuak tawh a, heng zingah hian Everton thawhpui zinga mi Alisher Usmanov pawh a tel. UK sorkarin Abramovich la hrek chiah lo mah se thil kal dan enin a tih ngei a rinawm a, tuna Chelsea zawrh hi Abramovich tan chuan thutlukna fing a ni.

Labour MP Chris Bryant chuan Thawhlehni khan, "Abramovich hian a chunga kut kan lek a hlau hle a, hei vang hian naktuk (Nilaini) khian a in pakhat chu a hralh ang a, in dang pawh a la hralh leh ang," a ti.

Nilaini khan Prime Minister zawhna pek hunah Labour leader Keir Starmer chuan Abramovich hrem a la nih loh reng chhan a zawt a, UK PM Boris Johnson chuan mimal thil sawi hun a nih loh thuin a chhang - sorkar thupuangtu chuan Abramovich hremna tur an la hmuh loh thu a sawi bawk.

Thil thlen dan
24 February: Russian President Vladimir Putin chuan sipai chakna hmangin Ukraine a lut.
25 February: UK political party Labour MP Chris Bryant chuan a MP puite hnenah Roman Abramovich chu Chelsea neitu a nihna hlihsak a, a thil neihte hrensak a ṭul thu a sawi a, Russian sumdawng hausa hi eirukna thila a inhnamhnawih thu a sawi.
26 February: Abramovich-a'n Chelsea enkawl hna chu Chelsea charitable foundation kuta a hlan thu a sawi.
27 February: Foundation member-ten Charity Commission danin club enkawl a phalsak leh phalsak loh chungchangah zawhna an siam a, League Cup final-ah Liverpool ngam loin Chelsea an tlawm bawk.
28 February: Ukraine sorkar chuan Russia nen inremna an neih theih nana palai hna thawk turin Abramovich an sawm.
1 March: Charity Commission chuan Chelsea-in charitable foundation kuta an club an dah hnuah engmah an la hrilh loh thu an sawi.
2 March: Swiss mi hausa tawntaw Hansjorg Wyss chuan Abramovich-a'n Chelsea a zawrh thu a sawi.
2 March: Abramovich-a'n Chelsea hralh a duh thu a puang.