FIFA 22 aṭangin Russia paih dawn

Video game developer lar EA Sports chuan FIFA 22 aṭangin Russian national team leh Russian club zawng zawng an paih dawn a, EA Sports chuan, "Ukrainian mipuite kan dinpui tlat a, remna a awm a, Ukraine run hi a tawp kan duh takzet," an ti.

EA Sports chuan, "Kan thawhpui FIFA leh UEFA te kalphung zulzuiin, Russian national team leh Russian club te chu EA Sports FIFA product: FIFA 22, FIFA Mobile leh FIFA Online aṭangin paih an ni ang.

"Kan game-a thlak danglam tur awmte pawh kan thlak zel a, kan hmalaknaah chuan kan game hmangtute kan inhrilh hre zel ang. Dawhthei taka min nghak ṭhintu kan game kheltute chungah pawh lawmthu kan sawi e," an ti.

Football khawvela thuneitu sang ber FIFA leh European football thununtu UEFA te chuan, Russian football club zawng zawng leh national team te chu an hnuaia inelna zawng zawng aṭangin tiam chin awm loin an lo hrem tawh a ni.