Farke-a'n Russian club chhuahsan

Norwich City manager hlui Daniel Farke chuan Russian Premier League club Krasnodar chu match khat pawh a kaihhruai hmain a chhuahsan a, Ukraine leh Russia indona avanga thutlukna siam a nih thu a sawi.

Farke chuan, "Tunlai khawvela thil thleng mek te, nupui fanau leh ṭhian ṭhate ngenna leh, infiamna huanga hmachhawp tam takin awmzia a neih tak loh avangtein uluk takin he thutlukna hi kan siam ta a ni," a ti.

German coach chuan, "Ni khatna aṭangin duat takin min lo chhawn a, kan tan chuan thutlukna harsa a ni. Hun rei lo tê chhungin ram hrang hranga mite nen inpawhna thuk tak kan siam hman a, hlim leh lawm taka infiamna khawvela kan tum ram thlen ho kan tum laiin khawvel buainain min nangching ta si a ni," tiin a sawi.

Farke hi November 2021 khan Norwich chuan a hna aṭangin an ban a, kum li a awm chhungin Canaries hi Premier League-ah vawi hnih a kaipui - mahse, a chhuahsan hian Premier League table mawngphah an luah a, match 11 aṭangin point nga chiah a hmuhpui.

January khan Kras-nodar hi kum 2024 nipui thleng cham turin a pan a, kar hmasa khan a match hmasa bera Lokomotiv Moscow hmachhawn tur an ni - mahse, indona avanga Krasnodar airport khar a nih rih avangin a hun sawn a ni.

Krasnodar pawhin thuchhuah siamin, "Krasnodar leh Daniel Farke te chuan inhriatthiam tawnnain contract kan titawp a, German coach rual hian a assistant Edmund Riemer, Chris Domogalla leh Christopher John te pawhin club an chhuahsan ve nghal a ni," an ti.