Puitea'n Blasters tan beiseina a siam

Kerala Blasters chuan Nilaini zan khan tun season-a an match pawimawh bera chhal ngam an khel a, Mizo tlangval K. Lalṭhathanga (Puitea) chu hero of the match atan thlan a ni.

South Indian club hian Mumbai City chu 3-1 in an hneh a, Blasters tan Alvaro Vazquez chuan goal hnih khungin Sahal Abdul Samad chuan goal khat a thawh bawk a, Mumbai tana Diego Mauricio-a penalty chhuih luhin awmzia a nei phak lo.

Blasters-in hnehna an chan avangin semifinal lut turin an league match tawp bera FC Goa inhnehtawkpui a tawk a, Mumbai tan match tawp bera Hyderabad hneh bakah Kerala an tlawm tel a ngai ta thung.

Buaina karah
ISL-ah zan dar 7:30-a match khelh a nih dawnin, inlan tur team-a player-te chu zan 6:40-ah, khelmual chhunga warm-up nei tura beisei an ni a, Nilaini zana an inkhelh dawn hian Blasters an talbuai - zan dar 6:50 khan traffic jam-ah an la tang!

Puitea chuan, "Stadium pan aṭang khan kan tluang lo nghal a, warm-up hun tawha traffic jam-a la tan chu rilru a buai duh hle. Mahse, kan buaina khan kan pressure neih tur a la bo zawkin ka hria a, kan inlungrual phah a ni," tiin buaina chu malsawmnaa an chantir thu Vanglaini a hrilh.

Blasters tan Sahal chuan minute 19-naah ama thawhrah sengin goal hmahruai a khung a, first half hun pek belh minute hnihnaah Vazquez chuan ama hlawhchhuah penalty chu goal-ah a chantir bawk - chawlhlawkah 2-0 in hma an hruai.

Bul ṭan ṭhat
Puitea'n, "Kan bul ṭan ṭhat rah kan seng a, kan vannei tel bawk," a ti a, a sawi dik - first half-ah goal hnih an nei sa a, second half-ah pawh bul ṭan ṭha zawk an ni.

Mumbai keeper Mohammad Nawaz-a'n penalty chawitu Mourtada Fall-a ball pek a pet ṭhelh a, a bul hnaia lo awm Vazquez chuan hei hi remchangah lain goal a khung a, 3-0 a ni der.

Beiseina tlemte an neih tawh chhi nung turin Mumbai tan Mauricio chuan 3-0 hnuah penalty a hlawh chhuak a, goal-ah chantir mah se a tlai hret tawh a, ISL semifinal khel lo thei dinhmunah an ding ta.

Hliam kara beiseina
Puitea chuan, "Inkhelh hmain practice-naah ka inhliam a, rilru a buai duh hle. Pathian hnenah ka ṭawngṭai a, ka ṭawngṭaina chu chhanin a awm ta a ni," tiin Vanglaini a hrilh a, Pathian vanga inlan thei a nih thu a sawi.

Bethlehem Vengthlang tlangval hi Blasters coach Ivan Vukomanovic-a'n a theihna a hrechiang a, Serbian coach hian, "Thutlukna chu i kut a ni," tiin Puitea chu a inlan dawn leh dawn loha thutlukna siam turin a ti.

Game pawimawhah Puitea'n a team tana khelh a thlang a, a tawpah ropui taka chawimawiin a awm. Mizoram Premier League chhul chhuak Puitea chuan, "Hero of the match nih ka beisei lo a, kei aia phu an tam," tiin inngaitlawm takin Vanglaini a hrilh.

Engtin zel?
Puitea chuan a hliam chu na tak ni lo mah se na a la neih thu a sawi a, Bethlehem Vengthlang midfielder hlui chuan, "Ka malpuiah hian na chu a la awm deuh a, doctor-ten min enfiah hunah engkim a chiang ang," a ti.

Blasters hian Pathianni zan dar 7:30-ah match tawp ber khel turin FC Goa an hmachhawn dawn a, point an hmuh chuan semifinal an khel ang. Puitea chuan, "Mimal ang chuan ka season ṭhat ber ṭum a ni.

"NorthEast United-ah khan semifinal kan khel a, team anga ka season ṭha ber ni tur chuan semifinal luh ve leh phawt a ngai. Mahse, eng team pawhin match tawp berah chak an duh dawn a, Goa hmachhawn hi a awlsam lo ang," a ti.

Ka lawm e
Puitea chuan, "Mumbai kan hneh a, a lawmawm. Mahse, tunah chuan champion sawi a la hun lo a, kan inkhel leh tur chiah kan ngaihtuah. Semifinal kan khel phak a nih chuan semifinal kan ngaihtuah leh phawt ang," a ti a, a ṭawng fimkhur hle.

Bethlehem Vengthlang tlangval chuan, "Kan veng mipui chungah ka lawm a, ka chanchin ngaihvena min rawn be tawk an awm reng a, min ṭawngṭaipui pawh an tam.

"Kan veng ni kher lo, Mizo mipui zingah pawh min duhsak taka min ṭawngṭaisaktu, ka chanchin rawn ngaihven ṭhin tam tak an awm a, an chungah ka lawm takzet," tiin lawmthu a sawi bawk.