Liverpool leh Chelsea tlang niah West Ham an tla

Roman Abramovich-a'n loh theih lohna avangin Chelsea a hralh tur thu a sawi hnuah lawkah Blues an inkhel. Thomas Tuchel-a naute hian Luton Town chu 3-2 a hneh hramin FA Cup quarterfinal an lut.

FA Cup last 16 inkhel dangah Liverpool chuan Premier League mawngphah luahtu Norwich City 2-1 in an hneh ve bawk. Team ṭha pahnih an chak lai hian West Ham United erawh Southampton mualah 3-1 in an tlawm thung.

Manchester City, Chelsea, Liverpool leh Southampton te an tlang a, nizan khan semifinal fixture pawh niin draw kan hre hman lo. Team ṭha pathum an la awm avangin semifinal paltlang pawh a awlsam lo ang.

Asian tlangval
Inkhel bul ṭantu zingah Sadio Mane, Mohamed Salah, Diogo Jota leh Luis Diaz te tel lo mahse Liverpool an buai lo - Asian tlangval Takumi Minamino an nei miau a lawm. Japanese forward hian goal hnih khungin Reds a chakpui.

Liverpool hian Chelsea hneha League Cup chawitu player 10 ngawt an siksawi. Tun ṭuma an khingpui hi team nem zawk an nih avangin Jurgen Klopp-a'n a player chhawr rim ṭhenkhatte hahchawlhna hun a pe hi a mak lo.

Goal hnih khungtu fakin Klopp chuan, "A goal khung pahnih kha a ṭha hle, goal hmaah a hriamin a theihna ang takin a khel chhuak thei kha ka lawm," a ti. Klopp-a neute hian tun season kal laiah Norwich hi vawi li ngawt an hnehna a ni ta.

Nomawi pali?
League Cup an chawi tawh a, tunah chuan Premier League, Champions League leh FA Cup an la beisei vek bawk. Tun season chhungin Liverpool hi nomawi pali chawi thei dinhmunah an la ding mek tihna a ni.

UCL-ah chuan Inter Milan lakah 2-0 in hma an hruai mek, harsat vak loin quarterfinal an luh a rinawm. League hmahruaitu Manchester City nen an inkarah point ruk a awm, match khatin an khelh tlem - an chak a nih chuan point thumah a tlahniam dawn.

Klopp chuan, "Player zawng zawng inkhel tura an inpeih a ngai, hlawhtlinna chang tur chuan insiksawi a ngaih chang pawh a awm. Khelmual chhunga lutten Liverpool khelh dan tur dik tak an hriat chuan a tawk," tiin a sawi.

Chelsea chak hram
Inkhelh ṭan hma lawkin an club hralh a nih tur thu a darh chiam a, hmanni lawka Liverpool an hneh lohna rilru hliam pawh a la dam hman lo - Chelsea tan chuan vanduaina hi a hlawm hlawmin a lo thleng a ni ber mai.

Championship club Luton Town lakah pawh minute hnihna lekah an che sual, corner aṭanga ball kal chu Reece Burke-a'n a tauh lut. Khel khat tak Saul Niguez hmangin Blues lamin si phurh an sut. Chawlhlawk hmain Harry Cornick hmangin Luton lamin hma an hruai nawn.

Second half-ah erawh Thomas Tuchel-a nauten team ṭha zawk an nihna an lantir. Timo Werner-a'n Ruben Loftus-Cheek hnen aṭanga a ball hmuh cool taka a khung bakah, striker Romelu Lukaku tan siamsak bawkin a theihna a pho lang.

Luton tan a na
Anmahni mualah ngei ṭum hnih ngawt hma an hruai thei, mahse a tawpah erawh a ruh no zawk an nih miau avangin a tlawm zawk an nih a ngai. Luton hian chhuanlam zawng duh ni se sawi tur an nei thei ang.

Minute 14-naah goalkeeper Jed Steer chu kerek hliam vanga thlak a ngai, an duh aia hmain substitution an siam a ngaih phah. Goal an chhuah hnuah pawh huaisen takin an bei let ngam, Championship playoff khel phak china awm an nihna pawh a takin a lang.

Luton an khel chhe lo, chutih rualin Chelsea tana League Cup final-a bul ṭan phak lotu chu Werner leh Lukaku te an ni a, anni pahnih hi a tawpa inkhel result thlak danglamtu an ni - Luton player nena khaikhin chuan an buk a in rih hleih mah mah a ni.