Fury-a'n chawlh a tum

WBC heavyweight champion Tyson Fury chuan April 23-a Dillian Whyte nen an inhnek zawhah boxing a chawlhsan tur thu a sawi a, British boxer hian tun hma pawhin chawlh a lo tum tawh tih hriat telsak erawh a ṭha.

Kum 33 mi boxer hi Whyte nena an inhnek zawhah chawlh a tum leh tum loh chungchang zawh a ni a, "Ka chawl ang," tiin a chhang a ni.

Fury chuan, "Vawi hnih ngawt world champion ka ni tawh a, ka bank account-ah pound maktaduai 150 ka nei a, ka ṭhatzia pholang turin tih leh tur chuang ka nei tawh lo," a ti.

Manchester khaw chhuak boxer chuan, "Whyte nena kan inhnek tur hi ka fight tawp ber a ni dawn. Pawisa ka ngah a, ka hrisel a, ka la naupang a, nawmchenna lawng ṭha tak ka lei dawn. Ka chawl dawn, he fight zawhah chuan ka chawl tawh ang," tiin a sawi.

Mahse, British boxer hi a sawi angin a chawlh erawh a rinawm loh - Anthony Joshua barakhaiha WBA (Super), IBF leh WBO title chhuhsaktu Oleksandr Usyk chu Joshua nen kumin kum tawp lamah an inhnek nawn leh dawn a, Fury hi he inhneka chak zawk hmachhawn tura beisei a ni.

Chutihrual chuan Usyk hi Ukrainian a ni a, Russia-in Ukraine a run hnuah an ramah a kir a, Russia bei turin an ram sipai a zawm. Usyk hian, "Ka thinlung chu Pathian ta a ni a, ka taksa leh zahawmna erawh kan ram leh ka chhungte ta a ni a, engmah ka hlau lo," tiin a sawi a, an ram thil thleng dan a zirin Joshua nen hian an inhnekin an inhnek lo thei.

Fury hian Whyte nen an inhnek tur atan media a hmachhawn a, he hunah hian Whyte chu tel ve tura beisei ni mah se a inlan lo. Fury chuan, "Ka ngaih danah chuan a tlawm tih lantir nan flag var a zar der tawh a ni.

"Hlauthawng takin a awm mek a, hmaichhana min hmachhawn a duh rih loh thu a sawite hi duh ngaihna a awm hleinem. Ka mit a en ang a, ka hnek sawp vek dawn tih a inhre mai dawn asin.

"Chu lo chhuanlam tur a awm lo - min hlau a ni. Mahse, kei chuan ka dem hran lo e," a ti a, Whyte tana a la san hret thu a sawi.

'The Gypsy King' hming lem an pek Fury hian vawi 32 fight a hmachhawn tawhah vawi 31 hnehna a chang a, vawi khat a khingpui a inhnehtawkpui - a inhnehtawkpui awmchhun hi Deontay Wilder a ni a, vawi thum an inhnekah vawi hnih a hneh tho.

Kum 33 mi Whyte-a'n vawi 30 fight-a hmachhawnah vawi 28 hnehna a chang a, vawi hnih a tlawm - Joshua leh Alexander Povetkin a ngam lo a, Povetkin erawh a hneh leh tawh thung.