Juventus an chak hmasa

Coppa Italia semifinal first leg-ah Juventus chuan Fiorentina 1-0 in an hneh a, final lut turin an dinhmun a ṭha. April 20 hian Turin khawpuiah second leg khelh a ni leh dawn.

Stadio Franchi-ah Dusan Vlahovic a kir lehna hmasa niin, Serbian striker hian bul ṭanin khel tluan mah se goal a khung lo. Goal awmchhun hi hun tawp dawna Lorenzo Venuti-a'n anmahni lama a tih luh palh a ni.

Juve coach Massimiliano Allegri chuan, "Player ṭha tam tak kan chhawr thei lo, chutiang chunga hnehna kan chang thei hi a lawmawm takzet. Rilru leh taksa a inpeih a, result ṭha neih phu khawpin kan khel chhuak," tiin a naute khelh danah a lungawi.

Turin club hian hliam leh hrem vangin player pakua ngawt an chhawr thei lo. An zingah hian Denis Zakaria, Paulo Dybala, Federico Chiesa, Giorgio Chiellini leh Weston McKennie te pawh an tel.

Fiorentina fans lamin an striker hlui Vlahovic lakah zahngaihna an lantir hreh lem lo. Club player zinga hlawh hnem ber ni tur pawha contract ziak duh lotu ni mah se, tha takin an lo dawngsawng, mahse ball a chan apianga au el tawk an lo awm erawh dem theih an ni lo.

Fiorentina coach Vincenzo Italiano chuan, "Goal khung tumin vawi 22 teuh meuh shot kan nei, chung zinga pakhat mah a hlawhtling lo kha thil mak a ni. Turin-a kan inkhelh hunah chuan a goal tawh ngei ang," tiin a sawi.

Coppa Italia
Semifinal First Leg
March 1, Thawhlehni zan
AC Milan 0 - 0 Inter Milan

March 2, Nilaini zan
Fiorentina 0 - 1 Juventus
JUV : Lorenzo Venuti 90+1' (OG)