Red Bull tan Verstappen a rinawm

Max Verstappen chuan Red Bull car khalh chhunzawm turin contract a ziak thar. Dutch tlangval hian kum 2028 thleng daih contract a ziak a, a contract hmasaa kum 2023 thleng daih chu hlawh hnem zawk la turin a ziak thar a ni.

Verstappen-a hlawh zat tur hi chiang taka tarlan ni lo mah se, khawthlang media lamin an tarlan dan chuan kum khatah pound maktaduai 33.3 - 41.7 vel bawr a hlawh ang; car intlansiakna sang berah hian contract ṭha leh sum tamna ber pakhat a tling.

Kum 24 mi Verstappen chuan, "Red Bull hi ka hmangaih a, season hmasa kan hman dan phei kha chu a nuamin a hlimawm takzet. Kum 2016 aṭangin thil tum mumal tak neiin hna kan thawk a, a hlawhtlinna kan chang thei kha ka lawm.

"Tunah chuan chona sang leh ṭha zawk kan hmachhawn leh dawn a, theihtawp kan chhuah chhuanzawm ang," a ti. F1 champion a nih hlim khan Red Bull tan hun rei tak chhung daih contract ziah a duh thu a lo sawi tawh a ni.

Red Bull team principal Christian Horner chuan, "Red Bull tan chuan kum 2028 thleng Max kan nei thei tur hi a lawmawm. Season tharah Max-a title kawl lai hi humhim ngei kan tum dawn," tiin a sawi a, an elpui Mercedes tan chanchin hriat nuam a ni lo ang.

Tun season aṭang chuan Red Bull hian chona thar an hmachhawn dawn. An car engine siamtu Honda chu F1 aṭangin an chhuak. Mahse, Red Bull hian kum 2024 thleng chu Honda hnuaia 'F1 engine technology' an hmang dawn.

Britain tlangval leh Mercedes driver ni bawk Lewis Hamilton hian season khatah pound maktaduai 40 a hlawh mek, world champion vawi sarih ni tawh hian hlawh pangngai bakah sumdawnna aṭanga a lakluh a tam thung.