Monaco hnehtu Nantes-in final an lut

Coupe de France-ah Nantes-in final lut turin Nilaini zan khan Monaco an hneh a, May 8 hian Nice nen nomawi an inchuh ang.

Stade de la Beaujoire-ah Monaco-in Guilermo Maripan hmangin minute 12-naah hmahruai mah se Djibril Sidibe-a'n an lamah minute 21-naah a tilut. First half-ah 1-1 a ni.

Second half-ah mualneitu Nantes-in an khung hmasa a, minute 74-naah Samuel Moutossamy-a'n hmahruaina goal a khung. Nantes ṭantute au thawm pawh a reh hmain minute 76-naah Monaco tan Myron Boadu-a'n siphurh a sut.

Minute 90 chhungin chak zawk an awm lo a, penalty hmangin chak zawk an zawng nghal. Nantes tana pen chhuakten an khung vek laiin Monaco aiawha pettu Wissam Ben Yedder leh Kevin Volland ten an pet goal. Mualneitu Nantes hi penalty shootout-ah 4-2 in an chak.