Valencia-in Copa del Rey final an lut

Copa del Rey semifinal chu March 2, Nilaini zan khan Mestalla Stadium-ah khelh a ni a, Valencia chuan mikhual Athletic Bilbao chu Goncalo Guedes goal hmangin 1-0 in an hneh. First leg-ah team pahnih hi 1-1 in an inhnehtawk a, second leg-a chak zawk Valencia-in inkhel pahnih belhkhawmah 2-1 in hnehna an chang.

Mestalla Stadium-ah mipui an khat ṭhat a, nomawi beiseina neia pungkhawm an nih avangin an thawm pawh a ṭha. Valencia tan Tottenham Hotspur aṭanga loan hmanga an hawh Bryan Gil a hmuhnawm nghal a, box pawn aṭanga a ball pet chu box pawnah a kal.

Inhliam vangin mualneitu midfielder Jose Gaya chu minute 33-na lekah Toni Lato-a'n a rawn thlak. Substitution siam zawh hnu lawkah Atheltic Bilbao zawkin chance an rawn nei a, Inaki Williams-a goal khung tur chu keeper Giorgi Mamardashvili-a'n a dansak.

Valencia ṭantute tan lawmna tur a rawn inher chhuak a, minute 43-naah Goncalo Guedes-a'n box pawn aṭangin mar pawtin a pet goal. Goal ropui bik hi inkhela goal awmchhun a ni a, inkhel boruak a tawp thlengin a ṭang.

Mualneitu lamin first half-ah goal an khung belh thei lo a, second half-ah pawh a nawrtu zawkah an ṭang zel. Amaherawhchu goal khat a him lo a, Bilbao tan Iker Muniain-a'n a chance ṭha neih chu a pet over. Inigo Martínez freekick pet pawh keeper Mamardashvili-a'n a man chat.

Hun tawp lamah Bilbao-in nawr mah se Valencia an ṭang tluan. Referee-in hun tawp ham rik a ham rualin technical area-a a awm player leh coaching staff te mual chhungah an tlan lut a, fan-te nen Copa del Rey final an thlen an lawm.

Final hi April 23-a khelh tur a ni a, Valencia hian nizana Real Betis leh Rayo Vallecano inkhela chak zawk an hmachhawn ang. Los Murcielagos (Valencia sawina) hian kum 2019 khan final-ah Barcelona hnehin a vawi riat nan nomawi hi an lo chawi tawh a, anmahni aia champion tam chu Barca (31), Bilbao (23), Real Madrid (19) leh Atletico Madrid (10) te chiah an awm.

Copa del Rey
Semifinal
Valencia bt Athletic Bilbao
Agg-ah Valencia 2-1 in an chak
1st Leg : February 10, Nilaini
Athletic Bilbao 1 - 1 Valencia
BIL : Raul Garcia 37'
VAL : Hugo Duro 65'

2nd Leg : March 2, Nilaini
Valencia 1 - 0 Athletic Bilbao
VAL : Goncalo Guedes 43'
Rayo Vallecano vs Real Betis

1st Leg : February 9, Thawhlehni
Rayo Vallecano 1 - 2 Real Betis
RAY : Alvaro Garcia Rivera 5'
REA : Borja Iglesias 26'; William Carvalho 68'

2nd Leg : March 3, Ningani
(Result kan hre hman lo)
Real Betis 1:30 AM Rayo Vallecano

Final
April 23, 2022
Valencia Vs Betis/Vallecano