Vawiin tlai 2:00-ah Aizawl FC Vs Neroca ; Mizo mipui puihna kan mamawh - AFC coach
Mizoram chhunga tun season I League match hmasa ber chu vawiin tlai dar 2:00 hian Rajiv Gandhi Stadium, Mualpuiah Aizawl FC leh Neroca ten an khel dawn.
Inkhel tur hi Mizo club leh Manipur club a nih bakah coach pahnih Gift Raikhan leh Manuel Retamero ten an club hlui an hmachhawn dawn a, match hnih aṭanga point khat ve ve chauh an hmuh avangin inkhel pawimawh tak a ni bawk.
Mizo a sawm
Aizawl FC coach Gift Raikhan hian season liam ta khan Neroca FC enkawlin I League season hmasa berah pahnihna nihpuiin best coach atana thlan a ni a, chona thar hmachhawnin Mizoramah a rawn kal a ni.
Gift chuan, "Neroca inkhel kan en chuan entu sing hnih chuang te an pungkhawm. Mizoram leh Manipur hi infiamna lamah chuan a ṭha lamin kan inel em em a, chuvangin Aizawl FC hian hnehna kan chan a ngai. Tuna inelna hi I League a ni a, Aizawl FC ni tawh loin Mizoram aiawh kan ni tawh a; Chanmari, Chhinga Veng, Chawnpui, Electric Veng, Ramhlun North leh Bethlehem Vengthlang te bakah football ngainatu zawng zawng ṭan khawm a ṭul a ni," tiin inkhel en turin mipui a sawm.
Aizawl FC hian match hmasa berah Shillong Lajong chu khualmualah hneh loh mah se Salt Lake Stadium-ah Mohun Bagan lakah point khat an hlawh chhuak a, injury time-a David Lalrinmuana freekick mawi tak chuan I League en châkna a tuh ang.
Hmabak harsa
Mizo club hian I League-a Neroca an hmachhawn zawhah Ningani hian MPL-ah Electric Veng FC an hmachhawn leh nghal dawn a, ni khat an chawl ang a, chumi zawh chuan I League champion lai Minerva Punjab an mikhual lehnghal ang. Punjab club hian match hnih khelh aṭanga point khat chauh an la hlawhchhuah avangin result ṭha hlawhchhuah tumin Aizawl an rawn thleng der tawh.
Aizawl FC coach Gift Raikhan chuan, "MFA-in an theih ang tawkin fixtures an siamrem tawh a, keini chuan sawisel loin kan squad chhah hmanna atan kan hmang mai tur a ni. Player 32 kan nei a, kan squad neih chhah hman ṭangkaina hun remchang a ni ang. Keini tan MPL hi sawisel ngawt theih a ni lo, Mohun Bagan lama goal khungtu pahnih Mapuia leh David te kha Ramhlun North laka an khelh ṭhat vanga Kolkata-a hruai ka ni," tiin an fixtures hautak zet chu a êng zawngin a thlir.
Gift chuan sawi chhunzawmin, "Kei chuan training-na leh match-a an khelh ṭhat dan aṭangin player ka thlang ṭhin a, tun hi player-te'n remchangah hmang se an theihna lantir hun ṭha tak a ni thei ang," tiin squad a siksawi tur thu a sawi.
Retamero a rawn let
Neroca coach Manuel Reta-mero hian I League-a Aizawl FC khelh hmasak ber ṭumin a enkawl a, Mizo mipui tan Spanish coach hi mi thar an ni lo.
Retamero chuan, "Aizawl ka rawn kal leh thei hi ka lawm, helai hmun hi nuam ka ti a. Mizo mipuite hi ka ngaina a, anni pawhin min ngaina vein ka hria. Tunah chuan ka club enkawl min ṭanpui a rem tawh lo a, Aizawl FC hian point an mamawh avangin nasa takin in ṭanpui a ṭul a ni. Chutihrualin kan club chuan point thum hlawhchhuah kan tum a, Mizo club hneh tumin kan rawn kal a ni," tiin a rawn kal chhan a sawi.
Neroca an ṭha
Manipur club hian I League season khatnaa pahnihna an nih avangin an phur thar a, foreign coach bakah foreign player ṭha an lalut. Mohun Bagan leh East Bengal player hlui pahnih midfielder Katsumi Yusa leh defender Eduardo Soares bakah Italian keeper Mauro Boerchio te an lalut a, foreigner che ṭha pathum defender Varney K Kallon, midfielder Aryn Glen Williams leh forward Felix Odili Chidi te an chelh bawk.
Amaherawhchu Mizo club vanneihna erawh tun ṭumah hian Japanese midfielder Katsumi Yusa leh Manipur player tawnhriat nei ṭha Subash Singh te an rawn zin thei lo. AFC coach Gift Raikhan chuan, "Neroca hian team indin ṭha turin sum tam tak an seng a, Katsumi leh Subash te rawn kal lo hi remchangah kan hman a ṭul a, kan hneh ngei a ngai," tiin Vanglaini a hrilh.
Vawiin inkhel tur
November 7, Nilaini
Aizawl FC 2:00 PM Neroca
Team Dinhmun
# Team P W D L GF GA GD Pts
1 Chennai City FC 3 2 1 0 9 5 4 7
2 Quess East Bengal 2 2 0 0 5 1 4 6
3 Real Kashmir FC 2 1 1 0 1 0 1 4
4 Churchill Brothers 3 0 3 0 2 2 0 3
5 Shillong Lajong FC 3 1 0 2 3 5 -2 3
6 Indian Arrows 2 1 0 1 2 4 -2 3
7 Mohun Bagan 2 0 2 0 3 3 0 2
8 Gokulam Kerala FC 3 0 2 1 4 5 -1 2
9 Aizawl FC 2 0 1 1 3 4 -1 1
10 Minerva Punjab FC 2 0 1 1 0 1 -1 1
11 NEROCA FC 2 0 1 1 1 3 -2 1