United-in Juventus tlawh dawn

Zanin dar 1:30 hian Turin-ah Manchester United-in Italian champion Juventus an hmachhawn dawn. Jose Mourinho hote hian Old Trafford-ah Old Lady hi an hneh tawh loh avangin an chak lo nawn a nih chuan knockout stage luh a harsa sawt ang.

Champions League group H inkhel dangah zanin dar zanin dar 11:25 hian Valencia-in an mual Mestalla Stadium-ah Young Boys an mikhual ve bawk ang. Spanish club hian team nem bera ngaih Switzerland club hi khualmualah an draw tawh avangin chetsual nawn a thiang lo.

Ronaldo bawk

Cristiano Ronaldo-a'n Juventus kawr hain Old Trafford-ah goal khung lo mah se Paulo Dybala-a'n goal awmchhun a khung theih nan a ṭangkai hle. Portugal captain hi football khawvelah Manchester United aṭangin hming a chher a, chanchin ṭha lam sawi tur pawh a ngah hle.

Ronaldo nena khel dun ṭhin United midfielder hlui Darren Fletcher chuan, "Club a rawn zawm tirh phat aṭangin khawvela ṭha ber nih duhna thinlung a nei nghal a, chumi tur chuan training-naah midang aiin a thawkrim a. A chang phei chuan a ke a ran theih nan 'ankle weights' te a hmang hial ṭhin. Ṭhenkhatin fiamthu thawh nana an hman chang a awm a, a thil tum a ṭhulh chuang loh avangin an zah phah hle," tiin a fak.

Tunah hian Ronaldo hi kum 33 mi a ni tawh chungin khawvela player ṭha ber zinga mi a ni a, Real Madrid aṭanga Juventus a zawm hnuah Italian club tan hian goal sarih a khung tawh a, Champions League-ah erawh goal a la khung lo thung.

Juventus chu

Italy-a roreltu Juventus hian an ram an zauh zel a, Europe-a champion rinkai zingah an telpha. Ronaldo chauh hi an inngahna a ni lo a, kartawpa Cagliari 3-1 a an hneh ṭuma goal hmahruai khungtu Dybala chu ven ngai zinga mi a ni ang.

Argentine forward Dybala bakah hian Mario Mandzukic, Douglas Costa, Miralem Pjanic leh Juan Cuadrado te chu ven ngai tur chu an ni. Tlarhnung lam erawh Leonardo Bonucci hoin an ṭha viau tura ngaih a ni a, Jose Mourinho meuh pawhin Italian defender Giorgio Chiellini chu Havard University-a defending chungchang class la tur khawpa a thiam thu a sawi.

Chutihrualin Chiellin hi hliam vangin Federico Bernardeschi nen match hnuhnung bera Cagliari an hneh ṭumin an inlan lo.

United ve thung

Manchester United-in Juventus an mikhual ṭumin Alexis Sanchez leh Jesse Lingard te an chhawr thei lo a, kar tawpa Bournemouth an hneh ṭumah erawh squad-ah dah an ni tawh. Hetihlai hian Antonio Valencia, Marouane Fellaini leh Diogo Dalot te chu chhawr theih an nih a rinawm lo a, Romelu Lukaku dinhmun a la chiang lo bawk.

United tana thu lawmawm chu Juventus an hneh loh hnuah Everton leh Bournemouth an hneh a, chak duhna thinlung an ngah tawh zawk bakah vanneihna an nei tel tawh bawk. French midfielder Paul Pogba chuan a club hlui Juventus a hmachhawn dawn a, United-in point hlawhchhuah an tum a nih chuan Pogba hi a chet ṭhat a ṭul dawn.

Mourinho tlarhnung erawh a phui lo chhunzawm zel a, keeper ṭha David de Gea an nei chungin Bournemouth leh Everton an hneh ṭum pawhin goal an chhuah tho a, Juventus lakah an talbuai leh ngei a rinawm.

Italy-a United sulhnu
Manchester United hian kum 1999 khan San Siro-ah Inter Milan chu Champions League quarterfinal-ah hmachhawnin 1-1 in an inhnehtawk a, hei hi Italy rama an tlawm loh vawi khatna a ni a, an treble champion
ṭum kha a ni bawk.

Hemi hma hian Italy-ah ṭum ruk an inkhel tawh a, an chak lo vek. Semifinal-ah Juventus hmachhawn lehnghalin 3-2 in hnehna an chang a, Italy-a an vawi khat chakna a ni a. Sir Alex Ferguson-a hnuaia an treble champion kalkawng hi mumang ang mai a ni. Kum 2003-ah pawh Juventus hi group stage 2-ah awm dunin Turin khawpuiah 3-0 in an sawp.

Amaherawhchu United hian Italy bikah result neih ṭhat an la harsat zel a, 1999/2000 khan group stage-ah Fiorentina an hneh lo a, kum 2005-ah AC Milan chu round of 16-ah an hneh lo a, kum 2007-ah AS Roma chu quarterfinal-ah an mualah 7-1 in sawp mah se khualmualah 2-1 in an hneh lo. Semifinal-ah pawh United hian AC Milan chu an mualah 3-2 a an hneh hnuin khualmualah 3-0 in an hneh lo.

2007-08 season-ah erawh AS Roma chu group stage-ah an inhnehtawk a, quarterfinal-ah Rome khawpuiah 2-0 in an hneh tawh thung. Kum 2009-ah Inter Milan nen San Siro-ah goal awm loin an inhnehtawk a, kum 2010-ah hemi stadium-ah tho hian AC Milan chu 3-2 in an hneh. Kum riat hnuah United-in Italy an tlawh leh dawn a, kum a vei tam deuh avangin hun kal tawh nena sawi zawm chiam a rem tawh kher lo ang.

Chutihrualin Juventus nen Italy bika vawi ruk an intawnnaah chuan United hi vawi hnih chauh an chak a, Old Lady hi vawi li an chak thung. An intawn tawhna hrim hrimah pawh Juventus an chak tam hret a, vawi 13 an intawng tawh a, Italian club hi vawi ruk chakin United hi vawi nga an chak a, ṭum hnih dangah an inhnehtawk.