Zaninah BC Bethlehem vs Serpents

Nizan aṭang khan Mizoram Super League khelh chhunzawm leh a ni a, zanin dar 7:30 hian Hawla Indoor Stadium, Republic Vengthlangah Basketball Club Bethlehem leh Zarkawt Serpents ten an match hnihna an khel ang.

Team pahnih te hi kai thar an ni a, tun season MSL an match hmasa bera chak lo ve ve an ni - Serpents hian tun hmain tualchhung basketball inelna sang berah hian tawnhriat an nei tawh; Bethlehem tan erawh thil thar zel a la ni rih.

Season hmasa khan Zarkawt Serpents hi division hniam zawkah awm mah se an che chhe lo, ADBBA Cup, I Division League leh Aizawl District champion an ni thei. Tun inelnaah hian feet 6 leh 8 inches zeta sang Ravi Bhardwaj leh Sahil Sharma te an nei.

Tualchhung basketball-a tawnhriat nei ṭha manager Michael Lalchhuanawma enkawlna hnuaia khel team hian match hmasa zawkah Mission Veng Vikings hneh lo mah se, an khelh fuh ṭum a nih chuan team lian dang pawh hneh thei turin an ṭha tawk.

Zarkawt BCA lakah 80-66 a chak loin BC Bethlehem hian MSL-5 bul an ṭan a, Zarkawt team hi a zawna hneh loh an duh lo ang. An match hmasa zawka an tum hi champion lai an nih bakah tun season team ṭha berte zinga mi an ni a, an tan thil thar a nih bawk avangin a awlsam lo - Lalruatfela naute hian zanin erawh basket khat chauh pawh a hlut zia hre ran chungin an inlan tawh ang.