Nadal kerek an zai dawn

Rafael Nadal chuan a pum lam chian loh vangin ATP Finals a khel thei dawn ta lo a, Spanish tlangval hi a pum chiang lo bakah a ke rek hliam chu zai a ni nghal dawn bawk.

Kar hmasa khan Nadal hi Paris Masters aṭangin a pum na vang bawk hian a inhnukdawk tawh a, hei vang hian a hnuai chiaha awm Novak Djokovic lakah pawh world number 1 nihna a hloh phah - number 1 ni chungin season a khar thei dawn ta lo tih a chiang.

Grand Slam vawi 17 champion tawh Nadal chuan, "Pum lam chiang lo vangin ka inkhel thei rih lo a, hei hi remchang a lain ka kerek chu zai a ni nghal ang. Ka ke hliam hi hun rei tak chhung chu a rukin ka tuar tawh a, na langsar tak a nih loh avangin a tawrh theih. Hun remchang a awm takah chuan kan zai thei ang," tiin a sawi.

Kum 32 mi Nadal a inlan theih dawn loh takah chuan November 11-18 chhunga khelh tur ATP Finals-ah hian John Isner chu a inlan theih phah dawn a ni. O2 Arena, London-a inelna neih turah hian player pariat chu group pahnihah ṭhen an ni a, an inkhelh kual hnuah group pakhata a sang pahnih zelin semifinal an lut ang.

ATP Finals khel tur hian group pahnih; Group Guga Kuerten huangah - Novak Djokovic, Alexander Zverev, Marin Cilic, leh John Isner te an awm a, Group Lleyton Hewitt lamah - Roger Federer, Kevin Anderson, Dominic Thiem leh Kei Nishikori te an awm thung.