Real an 'harh' zel dawn em?

Real Madrid-in coach lailawk Santiago Solari enkawlna hnuaiah match hnih khel tawhin hnehna an chang ve ve a, Europe-ah an harhna chan thar hi an chhunzawm zel thei dawn em tih chu zawhna awm a ni ta.

European champion hian an match hnuhnung pahnihah hian goal ruk ngawt an khung a, an lamah a lut ve lo. Goal khung theih loh vanga an selna chu thaibo rih a ni a, an tlarhnung pawp selna pawh tun atan chuan a bo rih.

Solari leh a naute hian zanin dar 1:30-ah Viktoria Plzen chu khualmualah an lenchilh dawn a, Champions League nomawi a zawna vawi thum chawi thei team tan chak loh a mawi lo ang.

Group G inkhel dangah zanin dar 11:25 hian AS Roma an inlan dawn bawk a, Real ang thoa match thum khelh tawh aṭanga point ruk nei team hian CSKA Moscow chu khualmualah an lenchilh dawn.

Solari tan fiahna

Real Madrid-in coach Julen Lopetegui an ban hnuah Spanish coach thlak turin Antonio Conte an be nghal a, mahse Italian coach hian 'demand' a ngah avangin an inrem thei lo.

Beisei ang coach an neih lawk theih loh avangin Real hian reserve team enkawltu Santiago Solari chu coach lailawk atan an ruat a, match hmasa pahnihah hnehna a chanpui nghal avangin season tawp thleng Real hi a enkawl dawn niin sawi a awm tawh.

Solari tan zanin hi Europe-a fiahna hmasa ber tur a ni dawn a, Real boss dinhmun hi 'lailawk' satliah ni loa luah a duh chuan Viktoria laka tlawm a thiang dawn lo.

Team pahnih intawn hmasakah 2-1 in Real-in hnehna an chang tawh a, mahse fans lawm a kim lo. Zaninah goal tam zawk khung tura beisei an ni ang.

Inlan tur

Real Madrid tan rawlthar duhawm Vinicius Junior chuan a vawi khat nan inkhel bul a ṭan beisei a ni. Brazilian forward hian Real Valladolid laka 2-0 a hnehna an channa inkhelah goal a khung a, Viktoria lakah bul a ṭan a nih pawhin a mak lo ang.

Spanish club tlarhnunga chhawr regular zingah Raphael Varane, Marcelo leh Dani Carvajal te chu hliam vangin an la talbuai mek a, hei vang hian Valladolid laka khel ṭha em em mai Sergio Reguilon chuan left back-ah bul a ṭan leh ngei a beiseiawm a, Nacho Fernandez chu a laia awm tura rin sa a ni.

Lopetegui khan league lamah Thibaut Courtois chhawrin Keylor Navas chu Champions League lamah si ban a nghah tir thung a, mahse zaninah Solari-a'n Champions League-a bul la ṭan lo Courtois zawk a chhawr a nih pawhin a mak lo ang.

Toni Kroos, Luka Modric leh Casemiro te chu dan pangngaiin bul ṭan tura beisei an ni a, tlarhma lamah Gareth Bale leh Karim Benzema chu bul ṭan tura beisei an nih avangin chawm tur lam chu an tlachham lo ang.

Roma mawina Dzeko

Europe-ah chuan Russia hi inkhelh harna ber pawla an sawi a ni hial a, CSKA Moscow khelmualah Real Madrid an tlawm a nih kha - zaninah Roma an lenglut ve thung dawn.

Mahse, Italian club hian thlamuanna pakhat an nei a, chu an thlamuanna chu Edin Dzeko a ni. Manchester City striker hlui hian league lamah season dang la phak rih lo mah se Champions League-ah erawh tawn chakawm lo ber pawl a ni mek.

Kum 32 mi striker hian Champions League match thum an khelh tawhah inlan vekin goal nga ngawt a khung tawh a, Moscow tlarhnung tan ngaihthah a thiang lo ang.

Dzeko hian season hmasa khan Europe-ah goal riat a khung thei a, Champions League semifinal hial an thlen theih nan a thawhhlawk hle. Zaninah pawh Moscow lakah en bik a hlawh leh ang.