Raptors chak chhunzawm zel

Forward langsar Kawhi Leonard tel loh niah pawh Toronto Raptors dan theih an ni rih lo, nimin zing NBA regular season inkhelah Toronto hian Utah Jazz chu 124-111 in an hneh a, season kal laiah Raptors hian vawi 10 hnehna an chan tlina chiah niin vawi khat chiah chak loh an nei.

Toronto Raptors hian a tir lam minute 20 chhung an khel ṭha tawk lo a, mahse quarter hnihna laihawl aṭanga khel ṭha ṭanin an kaltluan lai chuan 18-6 ngawtin point an hmu fal thei, chawlhlawk a thlen meuh chuan hmahruaitu an ni let thei a ni.

Raptors tan hian player panga ngawtin point 16 an score tling thei. Point guard Kyle Lowry chuan point 17 hmuin assist vawi 11 a nei a, Pascal Siakam pawhin point 16 a score bakah rebound vawi sarih a la bawk.

Jazz tan point 22 score tu Alec Burks chu player mala thawhhlawk a ni a, mahse a ṭhiante lam aṭanga chakna tur khawp thlawpna a hmuh ṭhat tawk loh avangin season kal laiah vawi ruk an tlawmna a ni thung a ni.