Etihad Stadium-ah Man United an lenglut dawn

Pathianni zan dar 10:00 hian Etihad Stadium-ah champion lai Manchester City-in an hmelma Manchester United an mikhual dawn. Pep Guardiola hote tan nomawi humhim turin chak ngei a ṭul a, anmahni hnaih bertu Liverpool-in derby match-ah hian an hmelma Man United an duhsak zawk ang.

Man City leh Reds inkarah point ruk chauh a awm tawh a, Jurgen Klopp-a hote hi match khata an khelh tlem avangin an inthlauhna hi match hnih khata chinfel theih a ni tawh. Hriat tel tur chu Liverpool hian Man City aiin goal difference an nei ṭha zawk.

Fiahna a inṭan
Sir Alex Ferguson-a'n tun hmaa ṭhenawm bengchheng tia a sawi Manchester City-in champion nomawi lam an hawi laiin Man United erawh season thara Champions League khelh phak tumin ṭan an khawh mek.

Manager lailawk Ralf Rangnick hnuaiah hian league match vawi 13 khel tawhin vawi khat chiah la tlawm mah se vawi nga ngawt an inhnehtawk. An match hnuhnung pangaah vawi thum an inhnehtawk a, point an hloh nasa hle.

German manager hnuaiah hian champion rinkai pathum Manchester City, Liverpool leh Chelsea bakah manager ṭha Antonio Conte kaihhruai Tottenham Hotspur an la hmachhawn lo. Man United-in team ṭha bik an hmachhawn ṭan dawn a, Man City zawh hian Spurs leh Liverpool te an tum dawn.

An khelh leh tur match thum aṭanga point kua an hmu thei a nih ngat chuan Champions League an khelh ngei a rinawm a, chutihrualin an khingpuite khelh dan thlir tel chuan point hmuh pawh a harsa dawn a ni.

Etihad Stadium a nghing
Thilmak tak erawh tun hnaiah Manchester United hian Etihad Stadium-ah record an nei ṭha takzet a, an match hnuhnung pangaa an record hian champion beiseina nei thar Liverpool ṭantute a ti lawm ngei ang.

Man United hian Etihad Stadium-ah match 21 khel tawhin match 11 an chak a, vawi riat chak loin vawi hnih an inhnehtawk. An match hnuhnung pangaah vawi li ngawt an chak a, vawi khat chiah an chak lo.

Tun season-ah Manchester City an kal fawr a, amaherawhchu big match a danglam ṭhin. Pep Guardiola hote hian league match 15 hneh loh nei loa an kaltluan hnuah an mualah Tottenham an hneh lo. Spurs laka an chak loh hmaa an hneh loh pawh Crystal Palace an ni a, Etihad Stadium-ah tho an tlawm.

United tan phurna
Manchester United-in Atletico Madrid leh Watford nen an inhnehtawk ṭumin Scott McTominay an chhawr thei lo a, Scottish midfielder thahrui ngah hian derby a khel thei dawn.

McTominay hian Covid-19 hri len hma khan Old Trafford-a entu mipui khat tlat hmaah Man City lamah goal a lo khung tawh a, tun ṭumah pawh hian hmun pawimawh a chan theih a rinawm.

Watford nen an inhnehtawk ṭumin captain Harry Maguire leh Jadon Sancho te bench-ah an awm a, England international pahnih hi bul ṭan thei zinga mi an ni. Marcus Rashford leh Luke Shaw ten derby match-ah tawnhriat an nei ṭha a, khelhna hmun a chang ang em, tih erawh hriatthiam a har.

Hun pawimawhah player danglam bik an inlar ṭhin a, hemi a nih avang hian Cristiano Ronaldo, Paul Pogba, Bruno Fernandes leh David de Gea ten en bik an hlawh ang.

Man City an ṭha
Manchester United tan point hlawhchhuah theih dan awm bawk mah se chak tura rinkai erawh Manchester City an ni a, nikum kum tawpa Old Trafford-a an inkhelh ṭum pawhin Pep Guardiola hote hi 2-0 in an chak. Season ṭan hma khan Man City hi Harry Kane nen sawi zawm an ni a, England captain-in Etihad Stadium-ah a theihna a pholang. Cristiano Ronaldo nen sawizawm an ni a, Portugal captain hian a theihna a pholang ve ang em, tih chu Pathianni zanah a hriat ang.

Man City hian out and out striker an nei lo a, chutihrualin an khelh dan mila tlarhmaa chhawr tur erawh an kawl hnem. Tun season Premier League bikah player 16 zetin goal an khung tawh a, goal khung lamah harsatna an nei lo.

Raheem Sterling, Riyad Mahrez, Bernardo Silva, Kevin de Bruyne leh Phil Foden te hian league nomawi chawi dan an hre tawh a, tun season-ah pawh an la ṭangkai reng. Pound maktaduai 100 man Jack Grealish hian a theihna tak la pho chhuak lo mah se squad tichhahtu a ni a, nomawi chawi dan pawh a thiam chho ṭep ang.

Man City hian point an hloh chuan khelh zat inangah Liverpool-in an nih rual theih avangin pressure an nei a, hemi tak hi inkhel hmuhnawmna belhchhahtu tur a ni. Team ṭha zawk Pep-a hoten chak an mamawh a, Rangnick hoten goal venhim ngaih pawimawha counter attack hmanga nawr an pawi ti lo ang.