Ballon d'Or result mak titu Salah

Football khawvela mimal chawimawina ngaihhlut hlawh bera chhal ngam Ballon d'Or 2021 chu November khan sem a ni a, rei tak a ngawih hnuah Mohamed Salah chuan pasarihnaa a awm chu mak a tih thu a sawi chhuak.

Season hmasaa goal 31 khungtu Salah chuan, "Ballon d'Or result kha chu mak ka ti ve deuh. Sawi tur chu ka nei tam lo - mahse, pasarihna ka nih kha chu tumahin an ring lo ang. Mahse, chu chu thil thlen dan chu a ni miau si.

"Thil dik lo a awmah ka ngai hran lo. Mahse, duhthlang sual leh vote thlak dan hre lo ram an awm ṭeuh a ni. Thil dik lo awm anga sawi theihna ka nei hran lo a, mahse, result erawh mak ka ti," tiin a sawi.

Ballon d'Or 2021kha Lionel Messi chuan a dawng a, Bayern Munich striker Robert Lewandowski leh Chelsea midfielder Robert Jorginho te chuan an dawt.

Salah hi pasarihna a ni a, top three nena an inkarah Real Madrid striker Karim Benzema, N'Golo Kante leh Cristiano Ronaldo te an la awm cheu a ni.

Best FIFA Football Awards 2021-ah erawh Salah hi pathumna a ni a, Lewandowski leh Messi a phak lo. Thil mak danglam tak erawh FIFA FIFPro Men's World XI-ah Salah hi a lang chuang lo.

Salah chuan, "World XI-a ka tel lo kha pawi ka ti a, mahse, tih theih ka nei lo. Mahse, mi tam takin World XI-a awm ka phu thu an sawi a, chu chuan min tilawm hle a ni. Keimah min huat avanga thil thleng chu a awmah ka ngai hran lo a, mahse, hei hi thil awm dan a ni miau si," a ti.

Egyptian forward Salah hian tun season inelna hrang hrangah match 32 khelin goal 27 a khung leh der tawh a, asssist vawi 10 a nei bawk - Reds hi League Cup nomawi a chawipui tawh a, FA Cup, Champions League leh Premier League-ah beisei an la nei vek bawk.

Reds hi Premier League table-ah pahnihna an ni mek a, hmahruaitu Manchester City chu point rukin an phak lo mek - match khatin an khel tlem thung a, Etihad Stadium-ah an la len dawn bawk avangin champion leh champion loh chu an kuta innghat a ni, tiin a sawi theih.

Jurgen Klopp-a enkawl team hian zanin dar 11:00-ah league match khel turin West Ham an mikhual dawn a, Hammers hian point hnih chauha palina Manchester United phak loin Champions League khelh an tum - a awlsam lo ang.

Chutihrual chuan Liverpool pawh an phur vanglai tak a ni. League Cup-a champion hlim an nih bakah inelna hrang hrangah match 14 zet chu a zawnin tlawm an nei tawh lo a, vawi 12 an chak a, vawi hnih an khingpui an inhnehtawkpui.