Bagan-in semifinal an khel dawn
Indian Super League hmawr bawk a hnai a, semifinal khel tur pawh a chiang chho zel. Ningani zan khan ATK Mohun Bagan chuan 1-0 in Chennaiyin an hneh a, a sang pali zingah an tel dawn tih a chiang ve leh ta.
Kolkata club tan hian Roy Krishna chuan first half hun pek belhah inkhela goal awmchhun hi a khung a, goal dang a luh loh avangin 1-0 in Bagan an chak.
Pathum chu
Bagan-in hnehna an chan avangin semifinal an khel dawn chiang a, Kolkata club an inpetkai hma hian Hyderabad FC leh Jamshedpur FC chu semifinal khel tur hian an lo inpetkai tawh bawk.
Semifinal hmun ruak pakhat a la awm a, Kerala Blasters leh Mumbai City ten an la beisei - Inrinni zan leh Pathianni zanah club pahnih an inlan dawn a, kartawpah semifinal khel tur chu chinfel a ni tawh dawn tihna a ni.
Mumbai Beiseina
Mumbai City-in zanin dar 9:30-ah Hyderabad an hmachhawn dawn a, Nizams (Hyderabad sawina) hian table chung ber luah chunga semifinal khelh an duh dawn avangin Mumbai tan a awlsam lo ang.
Lalengmawia (Apuia) leh Lallianzuala Chhangte te khelhna Mumbai tan hian chak ngawt a tawk zo dawn lo - an chak bakah, Pathianni zan dar 7:30-ah FC Goa-in Blasters an hnehsak a ṭul dawn. Midang kutah an innghat tel tihna a ni.
Blasters hmabak
FC Goa-in match 19 aṭangin point 18 chiah an la nei a, tun season-ah vawi kua an tlawm tawh. Blasters tan semifinal khel turin Goa laka point khat hlawhchhuah a tawk dawn a, chutihrual chuan Goa-in an match tawp bera chak an duh dawn avangin a awlsam lo ang.
Blasters midfielder K. Lalṭhathanga (Puitea) chuan, "Eng team pawhin match tawp berah chuan chak an duh ṭhin a, Goa hmachhawn hi a awlsam lo ang," tiin Vanglaini a lo hrilh tawh a, Pathianni zana team pahnih intawng tur hi a hmuhnawm ang.
Mangṭha mangchhia
Bagan laka tlawm Chennaiyin hian league match 20 an khel zo ta a, point 20 hmuin table-a pariatna niin season an khar a, Goa-in an match tawp bera Blasters an hneh chuan Chennaiyin hi pakuanaah an tla thla ang.
Chennai club-ah hian Jerry Lalrinzuala chu Mizo khel a ni a, Lianzuala'n season laihawlah Chennai club hi Mumbai a pansan thung. Jerry hian match 20-ah match 18 a khel tling a, khelmualah minute 1558 zet hun a hmang.