Mohammedan lakah Aizawl FC an tlawm

Aizawl FC-in I League-ah result ṭha neih an harsat. Mizo club hian an match hmasa bera Real Kashmir an hneh loh hnuin Ningani zan khan Mohammedan 2-0 in an hneh lo.

Kalyani Stadium-a inkhelah hian Mohammedan tan Trinidad and Tobago forward Marcus Joseph-a'n goal hnih a khung a, Mizo club-in a chhanletna a nei lo.

Mizo vs Mizo
Aizawl FC tan Mizo pakua ngawtin bul an ṭan a, Trinidadian defender Robert Primus bakah Telangana midfielder Rinreithan Shaiza te chiah hnamdang an awm.

Mohammedan lamin Mizo player panga an nei a, chung zing aṭang chuan keeper Zothanmawia (T. Mawia), Lalramchullova leh Brandon VL Remdika ten bul an ṭan.

Kolkata club hian foreinger pali - goal khungtu Joseph, Serbian midfielder Nikola Stojanovic, Montenegrin winger Andjelo Rudovic leh Syrian defender Shaher Shaheen te bul an ṭantir vek. AFC ang lo takin sa huai an ser nghal.

Danglamna Joseph
Aizawl FC-in point hlawhchhuah tum mah se Calcutta Football League 2021 champion-in tum dang an nei. Mohammedan tan Brandon-a'n chance ṭha a nei a, keeper Lalmuansanga tan dan a harsa lo.

Kolkata club-in an nawr nat avangin Mizo club an buai. Minute 26-naah Andelo Rudovic ball kheng ṭha zet chu Marcus-a'n a khung. Trinidian stiker hian minute 35-naah Aizawl tlarhnung tihsual zarah goal hnihna a khung.

Yan Law-a'n second half-ah inkhel thlak danglam tumin striker Willis Plaza leh defender Lalṭhakima te a luhtir nghal. Mizo club goal bawh na hret mah se Willis leh Lalremsanga Fanai ten an hun ṭha neih goal zawnah an pet thei lo - keeper T. Mawia'n goal a chhuah lo.

A harsa dawn
Aizawl FC-in an match hmasa berah foreign player leh player ṭha dang tel loin Real Kashmir an hmachhawn a, point an hmu lo. Tun ṭumah hian Covid-19 vangin an buai a, Aser Pierrick Dipanda Dicka leh Samuel Lalmuanpuia te an chhawr thei lo.

Mizo club hian point an la hmuh loh chhanah chhuanlam ṭha tak la nei mah se point an la hmu chuang lo. Aizawl FC coach Yan Law chuan champion thei tur squad an neih thu a sawi a, tuna an dinhmun thlir chuan champion a har dawn.

Aizawl FC hian March 8, Thawhlehni tlai dar 2:00-ah Rajasthan an hmachhawn dawn a, champion an duh a nih chuan point thum hlawhchhuah ngei a ṭul dawn a ni.