Russia-in FIFA leh UEFA khing dawn

Ukraine run vanga FIFA leh UEFA-in an hrem Russia-in ngawi renga hremna tawrh an tum lo a, Russian Football Union (RFU) chuan Court of Arbitration for Sport (CAS) ah football thuneitu sang pahnih chu an khin tur thu an sawi.

Thawhṭanni khan Russian national team leh football club zawng zawng chu thu leh awm hma atan FIFA leh UEFA chuan an hnuai inelnaa inlan thei lo turin an hrem a, RFU chuan he hmalakna hian dan ṭan chhan a nei loah an ngai a ni.

RFU chuan, "Hremna tihchhuah a nih hmain Russian Football Union chu thiamthu sawi tur pawhin hun ṭha pek kan ni lo a, hei hi mahni thiamthu sawi tura zalennna kan neih rah behna a ni," an ti.

Russian football thuneitute chuan, "World Cup 2022 qualifier aṭanga paih kan ni te hi, playoff-a kan hmachhawn turte hmalakna vang a ni a, hei hian infiamna kalphung leh dik taka inelna hmachhawn duhna chu a palzut a ni," an ti bawk.

FIFA chuan Russia hi Football Union of Russia tih hming chawia inlan a, mahni khelmual hmang thei lo tur leh flag leh hnam puanzar pawh zar thei lo turin a hrem hmasa zet a, mahse, hei hian sawiselna a tawk nasa.

England, Northern Ireland, Scotland, Wales, Poland, Czech Republic leh Sweden te chuan Russia inkhelhpui an tum loh thu an puang zui a, FIFA chuan thutlukna thar a siam leh ta a ni.

RFU hian an beisei anga thiam an chang a nih chuan World Cup playoff an khel leh thei ang a, an hmeichhe team-ten Euro 2022 an khel thei leh bawk ang.

Russian football thuneitute chuan zângnadawmna pawh an phut tur thu an sawi bawk a, hei bakah hian an dilnate hi a hlawhtling lo a nih chuan FIFA leh UEFA thutluknate chu tihkhawtlai a nih theih nan dilna an thlen leh dawn bawk a ni.

FIFA leh UEFA thutlukna hi Russia national team chauhin an tuar lo a, Russian club Spartak Moscow chu Europa League last 16 inpetkai mah se an khelh a rem dawn lo a, an hmachhawn tur RB Leipzig chuan hei hi vanneihpuiin quarterfinal an lut nghal dawn a ni.