Arsenal-in UCL an hnaih dawn em?

Pathianni zan dar 7:30 hian Vicarage Road-ah Watford leh Arsenal te an inkhel dawn a, Gunners hi paruknaah awm rih mah se an chunga awm Manchester United leh West Ham te aiin match thum ngawtin an khel tlem.

Mikael Arteta hote hi match hnuhnung pathumah an chak vek a, Wolves ṭum hnih an hneh bakah tun season match hmasa bera an hneh loh Brentford an hneh.

Gunners hian January transfer-ah Pierre-Emerick Aubameyang chhuahtir mah se Gabon striker tel lo hian dressing room boruak a ṭha zawk a, khelmualah pawh result ṭha an nei zel.

Premier League-ah squad naupang ber an ni a, player kum hi chawhrualin 24.2 a ni. Tuna an khelh dan thlirin season tharah Champions League an khel pha lo a nih pawhin Europa League tal an khelh a beiseiawm hle.

Spanish manager Arteta-a'n hmathlir thui tak a nei a, a rah a lang chho zel. Kum 2019-a pound maktaduai 72 zeta an lakluh Pepe a che ṭha chho a, Hale End chhuak Bukayo Saka, Emile Smith Rowe leh Gabriel Martinelli te nen an hmuhnawm. Wolves an hneh ṭuma khel lo ESR hi Watford lakah pawh la khel thei lo dinhmunah a ding thung.