Barty a chawl rih dawn

Hmeichhe tennis world number 1 Ashleigh Barty chuan hahchawlhna hun neih belh a duh. Tun hnaia a khelh tur Indian Wells leh Miami Open aṭangin a inhnukdawk a, an ramah a chawl rih ang.

January thla khan Barty hian Australian Open nomawi a chawi a, kum 44 hnuah Australian nula ngeiin anmahni rama Grand Slam title a lak lehna hmasa a ni hial. Melbourne khawpui chauh ni loin Australia ram pumpui an hlim.

Hlawhtlinna chang mah se a hnu lamah erawh Barty hi a la inkhel leh rih lo. Tun hmain dar, hnungzâng leh ke phah hliam vangin a lo buai fo tawh a, hliam vanga harsatna a tawh leh loh nan tournament khelh tlem rih a tum niin a lang.

Kum 25 mi Barty chuan, "Australian Open ka khelh hnu khan duhthusamin ngai ka la awh leh lo. Chuvangin Indian Wells leh Miami Open atan ka inpeih ve hman lo, tournament ka ngainat tak maia ka inlan thei lo tur hi a pawi ka ti hle," a ti.

Australian Open khelh zawh taka pahnihna Danielle Collins pawh Indian Wells aṭang hian a lo inhnukdawk tawh, hliam a neih vang a ni. Indian Wells hi kar leh aṭanga khelh tur niin; Miami Open chu tun thla tawp lamah an khel thung ang.