Champion tum Real hmaah Sociedad

European football-a top league-te pawhin season tawp an hnaih ṭan a, league-a team inum boruak pawh a sang tual tual - ṭhenkhatin champion an tum laiin, inhamtan hram dan ngaihtuah an awm bawk.

Club ṭhenkhatin European football khelh phak hram an duh a, club hmingṭhat nana khel an awm bawk–thlen tum chin inang lo, mahse, point thum mamawh ṭhah inkhel chho an ni a, hmuhnawm lo a tlem sawt.

Zanin dar 1:30-ah pawh league match khel turin Real Madrid-in Real Sociedad an mikhual dawn a, Real-in champion an tum laiin Sociedad tum ber erawh season thara Champions League khelh phak a ni.

Pathianni zan dar 8:45-ah Barcelona an inlan dawn bawk a, Xavi hnuaia harhtharna chang mek team hian Elche chu khualmualah an lenchilh ang.

Champion tum
Real-in league match 26-ah point 60 hmuin hma an hruai mek a, an hnuaia awm Sevilla aia an sanna chu point ruk chauh a ni - Sevilla hi nizan khan an inlan a, he thuziak i chhiar meuh chuan an inthlauhna hi a danglam leh tawh ang.

Hei vang hian Carlo Ancelotti enkawl team tan champion turin fimkhur a la ngai tih a lang chiang a, Sociedad-in Champions League khelh an tum bawk si avangin a awlsam dawn lo.

Sociedad hi table-ah parukna an ni mek a, palina Barcelona an phak lohna chu point khat chiah a ni - Real an hneh chuan Pathianni zana Barca inlan hmain table-ah palina an ni hman dawn tihna a ni.

Chumi awmzia chu Sociedad-in hnehna an chan chuan Barcelona-in pressure an neih belh dawn tihna a ni a, David Silva telna team tan zanin an chak leh chak loh hi an hma hun hril theitu match pawimawh tak a ni dawn.

Kroos a tel ve lo?
Spanish chanchinbu lar Marca-in a tarlan danin Real midfielder pawimawh Toni Kroos chu tihrawl hliam vangin inlan lo thei dinhmunah a ding mek a, German midfielder tel lo chuan Real hi an zuamawm sawt ang.

Chutihrual chuan he team hian Luka Modric leh Casemiro an nei tih hriat a ṭha a, tlarhmaah season duhawm tak hmangtu, goal 26 khung tawh Karim Benzema leh goal 16 khung tawh Vinícius Júnior an nei bawk.

Real hian Nilaini zan dar 1:30-ah Champions League last 16 second leg khel turin Paris Saint-Germain an hmachhawn dawn tih hriat tel sak erawh a ṭha a, 1-0 a an hnufual sa avangin Ancelotti tan neih zawng zawng thawhchhuahpui chi erawh a ni lo.

Sociedad hian tun season-a goal 12 khung tawh Mikel Oyarzabal, goal riat khungtu Alexander Isak, Manchester City legend David Silva leh Manchester United midfielder hlui Adnan Januzaj te ho an kawl a, an tawh a khirh ang.

Barca tan beiseina
Xavi an neih hnuah Barca-in ṭan an la thar a, sum nei lo club khan January transfer-ah Ferran Torres, Pierre-Emerick Aubameyang leh Adama Traoré te an lalut thei a, thlasik transfer khar hnua league match li an khelhah tlawm an nei lo - vawi khat an draw a, vawi thum an chak.

Barca-in hmuh theihin hma an sawn a, Pathianni zanah Elche laka chak lo turin fan-te an indah phal lo ang–season thara Champions League khelh tum an nih avangin chak pawh an mamawh a, nipui transfer-a player ṭha hip turin European football khelh an mamawh.

Champions League khel tura Barcelona elpui Atletico Madrid chu Pathianni zan dar 1:30-ah an inlan dawn a, Diego Simeone enkawl team hian Real Betis an hmachhawn dawn avangin a awlsam lo ang.

Manuel Pellegrini enkawl Betis hi league-ah pathumna an ni mek a, Atletico aia an sanna erawh point khat a ni–Copa del Rey final lut hlim Betis hi Atletico-in an hneh theih chuan an tan Champions League khelhna kawng a inhawng zau sawt dawn tihna a ni–chak ngei an mamawh.