Harh tharna mamawh Bayern Munich

Eng nomawi mai pawh hi awlsam taka lak theih a awm lo - Bayern Munich tan pawh a awlsam bik lo. Bavarians hian ṭha taka season khar an duh a nih chuan boruak thar ṭha nena harhtharna chan an mamawh hle.

Season chawhma lam khan Bayern hi an kal filawr viau a, an hmaa ding apiang an sawp a ni ber. Mahse, tun hnaiah erawh Bochum lakah 4-2 in an mualpho a, Champions League last 16 first leg-ah pawh Red Bull Salzburg nen 1-1 in an inhnehtawk.

Bundesliga match an khelh hnuhnung berah Eintracht Frankfurt 1-0 in an hneh hram. An match hnuhnung bera point thum an hmuh ṭumah hian tun hma lama inkhel thunun leh hnehsawh taka an chak ang kha a ni lem lo.

Julian Nagelsmann-a naute hian zanin dar 8:00 hian Allianz Arena-ah Bayer Leverkusen an mikhual dawn, an mikhual tur hi table-ah pahnihna an nih avangin a awlsam lo ang, chutihrualin an intawn hnuhnung berah Bayern hi 5-1 ngawta an chak avangin zaninah pawh rinkai zawk an ni ang.

German manager Nagelsmann tan player ṭha zawng zawng chhawr vek erawh a remchang lo mai thei. March 8, Thawhlehni zanah UCL khel turin Salzburg an mikhual zui dawn, quarterfinal lut tur chuan goal an mamawh avangin league chauh an ngaihtuah a rem lo.