Giroud ka ringtawk - Milan manager

AC Milan manager Stefano Pioli chuan a striker Olivier Giroud a rintawk thu a sawi. France international hian Pathianni zan dar 1:15-a Napoli an tlawh hunah danglamna a siam theih ngei a beisei thu a sawi bawk.

Zlatan Ibrahimovic chu hliam vangin a chawl mek, kum 35 mi Giroud hian an mamawh goal a lo khung fo tawh avangin a lakah beiseina an nei sang hi a mak lo. Season kal laia goal 10 a khung tawh hi San Siro-ah vek a nih avang erawh chuan rin dan tawk thiam a harsa.

Chhuanlam awm lo
Milan manager Pioli chuan, "Chhuanlam kan siam lo ang, kei chuan engtik lai mahin chhuanlam siam hi ka duh ngai lo. Player ṭhenkhat an khel thei lo a nih pawhin khelmual chhunga lutten Milan player an nihna an lantir theihna remchang a ni," a ti.

Ibra hi bench lamah chuan a ṭhu thei tawh tura ngaih a ni a, ani bakah hian thlasik bazara an lei Marko Lazetic chu an la chhawr thei dawn lo. Forward Ante Rebic leh Giroud chungah mawhphurhna a sang zual dawn.

Serie A hmahruaitu Napoli hi an boruak ṭhat lai tak a ni. Barcelona lakah mualpho mah se team ṭha Lazio 2-1 in an hneh thei a, legend Diego Maradona hunlaia an champion hnuah a vawi khat nan champion an beisei leh mek.

Argentina captain hlui Maradona hoa Napoli an champion lai khan an elpui chu AC Milan tho hi an ni. Tun ṭuma Napoli leh Milan inkhel tur hian kum 1987 thawnthu tam tak kha a herlum leh a, Naples khawpuiah Serie A nomawi hawn an tum ruh hle.

Juve beiseina
Nizan khan champion lai Inter Milan an inlan a, an chak a nih chuan Serie A hmahruaitu an ni ang. Inter bakah hian Napoli leh AC Milan te hi champion tura rinkai leh beiseiawmte an ni, palina Juventus pawhin beisei an la nei.

Old Lady forward Paulo Dybala chuan, "Inelna hi a zawh hma chuan kan beidawng tur a ni lo. Serie A match khelh hmabak kan la neih hi ngun takin chhut ila, champion lai Inter hi Turin khawpuiah kan la mikhual dawn, chuvangin engkim a la danglam thei," a ti.

Argentina international hian tun hnaiah hliam vangin match hnih a khel thei lo, tunah erawh training a nei pangngai tawh - Pathianni zana Spezia nen an inkhelh hunah chuan a bul ṭantu zingah pawh a tel thei tawh ang.

Kum 28 mi Dybala chuan, "Ka ṭha tawh, inkhel tur pawhin ka inpeih. Player tan chuan inkhel loa awm hi a hrehawm lai ber chu a ni, hun rei lo tê chhung chawlh pawh hi rei tak ang mai a ni ṭhin," tiin a sawi a, an player thar Dusan Vlahovic nena khelh dun nuam a tih thu a sawi bawk.