Djokovic tan kawng a inhawng dawn?

French Open khel thei turin Novak Djokovic tan kawng a inhawng dawn niin a lang. French prime minister Jean Castex chuan tun thla chawhnu lamah Covid-19 vanga inkaihhruaina an thlahdul tur thu a lo sawi tawh.

Tun dinhmunah chuan, infiamna leh mipui punkhawmna hmuna kal tur tan vaccine an la kim tawh ngei a ni tih lantirna a ngai. March 14 aṭang chuan France hian inkaihhruaina dan thar an hman a rinawm a, vaccine lak chungchang pawh hi hlih tura tih zingah a tel.

Castex chuan, "Hri leng do kawngah nasa takin hma kan sawn, tunah chuan kan thunun theih chinah kan dah tawh niah kan ngai. March 14 aṭang chuan vaccine lakna tih lan kher pawh a ngai tawh lo ang," tiin a sawi.

Djokovic tan chuan Castex-a thusawi hi thil lawmawm bik a ni ngei ang, ruahman anga an kal thei a nih chuan French Open bakah clay court inelna dang Monte Carlo Masters chu harsatna nei loin a khel thei ang.

Serbian star Djokovic hi vaccine la duh lo zinga mi a ni a, hei vang hian Australian Open nomawi a kawl lai humhim tur pawhin tournament a khel thei lo. Melbourne khawpuiah thlawk lut hman mah se, inelna neih hmain an thawn kir leh a ni.

World number 2 hian Grand Slam nomawi 20 a chawi tawh, a tluk loh awmchhun chu vawi 21 champion tawh Rafael Nadal chauh a ni. Nadal leh Novak hi season kal laiah na takin an inel chhunzawm dawn niin a lang.