Vietnam-ah Formula 1

Khawvela car intlansiakna sang ber Formula 1 chu 2020 aṭang­in Vietnam khawpui Hanoi-ah tlan ṭan a ni dawn tih a chiang ta a, inelna hi April thlaah an thlen dawn avangin season tir lamah an thleng dawn tihna a ni.

Liberty Media-in thuneihna an chan pumhlum hnuah Vietnam Grand Prix hi calendar-a an telh thar hmasak ber a ni a, Asian ram zingah Singapore, China leh Japan te hnung zuiin F1 an thleng ve dawn.

F1 chief executive Chase Carey chuan, "He infiamna huangah hian 2017 aṭangin kan inrawlh thuk a, engtiangin nge hma kan sawn zel ang tih hi kan ngaihtuah lian ber pakhat a ni. Kan Motorsports team leh Hanoi khawpui thuneitu lamin inremna an siam thei hi kan tan chuan chanchin lawmawm a ni," tiin a sawi.