India-in T20 series an la
Twenty20 international-ah India chuan Thawhlehni zan khan khan run 71-in West Indies an hneh a, series match thum an khelh turah vawi hnih an chak tawh avangin series an la chiang tawh.
Men in Blue tan Rohit Sharma a vul zel a, kum 31 mi batsman hian ball 61 lek a hmachhawnah run 111 a siam a, a dinpui Shikhar Dhawan chuan run 43 siamin a pui ṭha viau bawk.
India hian over 20-ah run 195 siamin wicket hnih chiah an hloh a, Windies tan umphak huphurhawm tak a ni tawh.
West Indies hian over 20-ah run 124 an tlin hram a, wicket kua an hloh a, run siam hnem ber Darren Bravo pawhin run 23 bak a siam thei lo.
Indian bowler zingah vawm ṭha bik tia sawi tur an awm lo a, Bhuvneshwar Kumar, Jasprit Bumrah, Khaleel Ahmed leh Kuldeep Yadav te chuan wicket hnih ṭheuh an la.
Pathianni zanah team pahnih hi an intawng leh dawn a, West Indies hian hnehna an chang a nih pawhin 2-1 in Men in Blue hian series an la fel dawn tho a ni.
India rama tour rawn nei West Indies hian India nen test leh ODI series pawh an lo khel tawh a, T20-ah India-in series an lak leh tak avangin series lak ve nei miah loin an puanthuah an tel dawn.