Reds-in champion tum zel; neitu nei lo Chelsea chak

Liverpool-in Premier League-ah champion an tum tih an pholang leh ta a, Inrinni zan khan an mikhual West Ham chu 1-0 in an hneh - inkhela goal awmchhun hi Sadio Mane khung a ni.

Jurgen Klopp-a nauten hnehna an chan avangin hmahruaitu Manchester City chu point thum chauhin an thlau a, English top flight league-ah champion tum inum boruak a 'hot' chho zel.

Roman Abramovich-a'n Chelsea a hralh tur thu a puan hnua a vawi khat nan Chelsea an inlan a, Burnley khelmualah goal li ngawt an khung. Blues tan Kai Havertz chuan goal hnih a khung a, Reece James leh Christian Pulisic ten goal khat ve ve an khung bawk; 4-0 in an chak.

Chelsea-in point 10 ngawtin hmahruaitu City phak lo mah se match khatin an khel tlem zawk tih hriat a ṭha a, London club tan champion beiseina a la thi bik lo.

Reds vanneihna
Minute 27-naah Liverpool-in goal hmahruai an khung a, Trent Alexander-Arnold-a shot nia lang chu Mane chuan lo tawk hmanin goal-ah a chantir a, he goal hi chak nan an hmang zui - Arnold hian tun season inelna hrang hrangah vawi 16 assist a nei tawh!

Anfield-ah Liverpool-in chak an phu zawk a, chutihrual chuan an vannei tel bawk. Hammers tan Pablo Fornals-a'n Alisson chiah a hmachhawn chungin 'chip' khum a tum a, Arnold chuan goal line aṭangin a lo pet chhuak hman.

Manuel Lanzini-a'n West Ham tan chance duhawm nei bawk mah se Alisson chiah a hmachhawn chungin a khung thei lo a, Michail Antonio-a chance duhawm chu Naby Keita chuan a tibuai hman bawk.

Klopp chuan, "Game a inhawng viau a, vanneihna kan mamawh tel. Heti zat match kan chak zawn tawh a, vanneih chang hi chu a awm ve a ngai a ni," a ti.

Liverpool an thiam
Klopp ngei pawhin an vannei tih a pawm a, chutihrual chuan Liverpool thiamna sawi hmaih thei a ni lo - a bik takin Luis Diaz chu mit titlai a tling a, Colombian forward hi Liverpool tana khel tura duan sa reng emaw tih mai tur a ni.

Tlarhmaah Mohamed Salah leh Mane nena an inkawp chu an che rangin hmuh an nuam takzet a, Diaz hian vawi thum ngawt chu chance a nei hial - a vanneih zan a ni lo a, hun pek belha lakchhuah a niha fan-ten ding chunga zahna an lantir chu a khelh ṭhatzia nemnghehna a tling.

Klopp chuan, "Player ṭha tak a ni a, a thiamna hi a pianpui ve reng a nih avangin player enkawl awlsam ber a ni. Tlarhnung lam puih kawngah hmasawn a mamawh tih chu ka hria a, team tana theihtawp chhuah duh mi a ni," a ti.

Liverpool tan Salah pawhin inkhel ṭan phatah chance nei mah se goalkeeper Lukasz Fabianski a paltlang lo a, a tawpah erawh team ṭha zawk an chak - Reds-in Hammers an hneh hi Champions League khelh tum Manchester United, Arsenal leh Tottenham Hotspur tan chuan chanchin lawmawm a tling ang.

Lungphang lo la!
Russia-in Ukraine a do avangin Russia-in khawvel ensan a hlawh chho zel a, an mi hausate pawh khawvel sorkar ṭhenkhatin a hrek ṭan - Chelsea neitu Abramovich pawh UK sorkarin a thil neihte hrensak a tum thawm a awm a, Russian sumdawng hausa hian a club a zuar nghal.

Chelsea boss Thomas Tuchel chuan an club dinhmun chiang lo chuan a tihbuai thu a sawi a, Blues fan-te pawhin hlauthawng chungin Inrinni zanah an inkhel an thlir - first half chhungin goal an khung lo.

Mahse, second half-ah team ṭha zawk danglamna a lang a, minute 22 chhungin Kai Havertz (2 goals), Reece James leh Christian Pulisic ten goal khat ṭheuh an rawn khung a, 4-0 in an chak.

Team pahnih goal khung hmain Burnley-in goal khungna chance duhawm an nei - Ashley Westwood-a ball cross chhut sualtu Chelsea keeper Edouard Mendy chuan Dwight McNeil ke bulah tak ball a hnek thla a, mahse, English winger hian goal ruakah a khung lo!

Tuchel a lawm lo
Turf Moor-a inkhelah Premier League-in Ukraine a thlawp tih lantir nan kut benga hun hman a ni a, hetihlai hian Chelsea fans ṭhenkhat chuan Abramovich hming an lo lam.

Chelsea fans ṭhenkhat chuan inkhelh chhung zawng Abramovich hming hi an lam a, Burnley fan-ten auh elna hmangin an chhanglet. Tuchel chuan, "Tun hi Abramovich a pual a ni lo.

"Midang tawrhpuina kan lantir a nih chuan lungrual takin kan lantir tur a ni. Tun hi thuchah dang lo neih hun a ni lo a, zahna lantir hun a ni. Kan fan-te hian he hunah hian zahna an lantir tur a ni.

"He thil hi Ukraine tana ti kan ni a, thil dang a awm lo. Kan rilruin Ukraine a hre reng a, kan inlungrual tlat tur a ni," a ti a, club mi pawimawhte thlahna hun chu a hranpaa a awm ṭhin thu a sawi bawk.

Tu nge tla dawn?
Champion inum tluk zetin tlak hlau inkhel pawh a hmuhnawm a, Brentford chuan an elpui Norwich City chu 3-1 in an hneh. League match riat zet a zawna an chak zawh tawh loh hnuah Brentford tan Ivan Toney chuan hattrick a siam.

Toney goal khung pathum zinga pahnih chu penalty aṭanga a chhuih luh a ni a, Norwich tana Teemu Pukki goal khungin awmzia a nei lo - Brentford tan Christian Eriksen chuan a vawi khat nan inkhel bul a ṭan bawk.

Newcastle United-in neitu thar an vanneihpui zel a, Ryan Fraser leh Fabian Schar goal hmangin Brighton & Hove Albion chu 2-1 in an hneh - Brighton tana Lewis Dunk goal khung chu scoreline cheimawina a chang a, Magpies hi table-ah 14-na an ni ta.

Aston Villa-in 4-0 in Southampton an sawp a, Steven Gerrard-a naute tan top 10 huanga season khar turin dinhmun a ṭha ta hle - Villa tan hian Ollie Watkins, Douglas Luiz, Philippe Coutinho leh Danny Ings ten goal khat ṭheuh an khung a, Ings hian assist pahnih nei telin Coutinho hian assist vawi khat a nei tel bawk.