Spinner ropui Warne-a'n mual a liam

Australia leg-spinner ropui Shane Warne chu lungphu chawl vangin March 4, Zirtawpni khan Ko Samui, Thailand-ah a thi. Warne-a thih niah vek hian Australian wicketkeeper hlui Rod Marsh chu kum 74 mi niin lungphu chawl thoin a thi ve bawk.

Kum 52 mi Warne hian Test match 145 aṭangin wicket 708 a la a, Sri Lankan spinner Muthiah Muralidaran (800) chiah Test inelna bikah amah aia wicket la tam a awm.

Warner hian kum 1992 aṭangin Australia tan a khel ṭan a, kum 15 chhungin ODI match 194 khelin wicket 293 a la. Aussies-in 1999 World Cup an champion khan player pawimawh a ni.

A thih dan
Shane Warne hi Zirtawpni zana thi ni mah se khawvel hriata puanzar chu Inrinniah a ni a, cricket leh infiamna ngainatute chauh ni loin khawvel a ṭhawng pha hial.

Warne enkawltu company chuan, "Lunghnur takin Shane Keith Warne a thih thu kan inhriattir, a thih chhan hi lungphu chawla ngaih a ni. Medical team-ten theihtawp chhuah mah se tih nun theih a ni tawh lo. Hun harsa an tawh lai hian a chhungte chuan an mimal zalenna zahsak turin an ngen," tiin thuchhuah an siam.

Aussies cricketer Warne hian Thailand-a thliarkar Koh Samui-ah in an nei a, helai hmunah hian a hun tawp a hmang. Ambulance thlen hmain a manager James Erksine chuan minute 20 chhung CPR a pe a, amaherawhchu an chhan thei ta lo.

Media ṭhenkhat tarlan danin Warne hian Australia a chhuahsan hmain a awm bawrah na a nei sa a, lung natna leh asthma a nei hrim hrim bawk. Erksine chuan, "Warne hian lung lam harsatna a nei tih ka hre lo a, a thih hnuah chauh ka hria. A thih hma hian ei leh in lamah a inhrek a, ni 14 chhung tui ril chauh a in," tiin a sawi.

Australian wicketkeeper-batter hlui Ian Healy chuan Warner a ui thu a sawi rualin a taksa a enkawl uluk loh avangin a kal hma hi mak a tih loh thu a sawi ve bawk

Warne an thlah
Melbourne Cricket Ground kawta Warner lim bulah fan-te'n pangpar, thlalak leh beer te an dah a, cricketer ropui hi an thlah. Victorian Premier Dan Andrews chuan Warne-a chhungten state funeral an pawm thu a sawi.

State funeral hi ram tana hlutna neite chawimawi nan an hun hnuhnungah an thlah ṭhin. Warne hi a chhungten Australia panpui nghal duh mah se nimin khan Thai khawpui pakhat Surat Thani-ah a ruang an endik. Thai police te erawhin a thih danah rin hlelh tur an nei lo thung.

Warne hi kum 2011 leh 2013 chhunga a kawppui Elizabeth Hurley, Sir Elton John, Rolling Stones singer Sir Mick Jagger leh milar ṭhahnem takin an ui thu an ziak.

Model leh actress Hurley chuan, "Chhumin ni a hliah a hlen turah ka ngai. Sakeibaknei anga thinlung huaisen neitu thlamuangin chawl ang che," tiin a thlah.

Cricketer ropui Warne hi cricketer ropui dangten an thlah a, Mizo zingah pawh Aussie legend hian ngainatu leh ngaisangtu a ngah hle.