ISL semifinal khel tur a hriat kim ta

Mumbai City-in 2-1 a Hyderabad an ngam loh avangin Indian Super League semifinal khel tur a hriat kim ta a, nizan khan Kerala Blasters-in FC Goa ngam lo pawh ni se semifinal an khel dawn chiang tawh.

Blasters hma hian Jamshedpur FC, Hyderabad FC leh ATK Mohun Bagan chu semifinal khel turin an lo inpetkai tawh a, hmun ruak dang pakhat hi Mumbai leh Blasters-in an inchuh.

Inrinni zana an inlan hmaa Mumbai mamawh chu hnehna chan a, nizana Kerala Blasters an tlawm bawk a ni - mahse, Mumbai hi Blasters result nghah buai ngai loin an tlawm a, semifinal khel tur a chiang.

Zirtawpni zan khan Jamshedpur chuan 5-1 ngawtin Odisha FC an sawp a, Bengaluru chuan 2-1 a East Bengal hnehin season an khar bawk.

Beisei phak lo
Mumbai-in semifinal khel turin chak ngei ngei an mamawh tih an hria a, transfer bazar-a sum hmang hnem club tan semifinal pawh khelh phak loh hi mualphona a ni - mahse, Mumbai-in an tlin ngang lo!

Minute 14-na lekah Rohit Danu chuan Hyderabad tan goal hmahruai a khung a, Joel Chianese chuan minute 41-naah a khung ve leh bawk - chawlhlawk hman a nih hmain chak tur a chiang tawh.

Mumbai tan Mourtada Fall chuan minute 76-naah si phurh sut ṭhen ve leh mah se a team a chhanhim zo lo a, hun tawp thlenga goal dang lut loin Hyderabad an chak.

Islanders (Mumbai sawina) tan Lalengmawia (Apuia) chuan inkhel bul a ṭan a, Lallianzuala Chhangte erawh squad-ah pawh a hmel hmuh tur a awm lo.

A mawngphah luahtu
Bengaluru FC-in semifinal an khel dawn lo tih inhre mah se an inthlahdah phah lo a, East Bengal chu 1-0 in an hneh - Sunil Chhetri chuan inkhela goal awmchhun hi a khung.

India captain hian tun season-ah match 20 khelin goal li chiah a khung a, assist vawi khat a nei bawk - kum 2016 khan match ruk lek khelin goal a khung lo a, hemi hnua ISL season khata goal a khung tlem ber ṭum a ni.

Kum 37 mi striker hian ISL-ah match 114 khelin goal 51 a khung tling ta a, assist vawi 10 a nei bawk - ISL-a goal khung tam lamah Bartholomew Ogbeche (52 goals) chiah a tluk lo.

East Bengal-in table mawngphah luah chungin season an khar a, season hmasa khan pakuana ni chungin season an khar bawk - Dungtlang tlangval Lalrinliana Hnamte chuan East Bengal tan hian bul a ṭan.

Paul-a goal
Jamshedpur-in minute 30 hmain Daniel Chima Chukwu hmangin goal hnih an khung a, 2-0 a ni der. Odisha beiseina siam turin Paul Ramfangzauva chuan first half hun pek belhah si phurh a sut ṭhen.

Kolasib tlangval tan tun season-a a goal hmasa ber a ni a, a goal khung hi captain armband hrengtu Jerry Mawihmingthanga thawhchhuah a ni - awmzia erawh a nei thui lo.

Jamshedpur tan Ritwik Das, Jordan Murray leh Ishan Pandita ten goal khat ṭheuh an khung leh a, 5-1 in an chak chiang hle - JFC tan defender pathum Laldinliana Renthlei, PC Laldinpuia leh Ricky Lallawmawma ten inkhel bul an ṭan vek.

Odisha tan Paul leh Jerry bakah Sebastian Thangmuansang ten bul an ṭan a, Isaac Vanmalsawma leh Daniel Lalhlimpuia te chu bench aṭanga luhtir an ni bawk.

A tawp kharna
ISL semifinal khel tur hriat kim tawh mah se league round khelh zawh a la ni lo a, semifinal-a team pali intawn dan tur a la sawi chian theih loh - zanin dar 7:30 hian league match tawp berah ATK Mohun Bagan leh Jamshedpur an inhmachhawn dawn.

Jamshedpur hian point 40 hmuin table chung ber an luah mek a, hmahruaitu ni chunga season khar turin an dinhmun a ṭha hle - head-to-head enna ISL-ah Bagan hi an lo hneh tawh bawk.

Men of Steel tan hmahruaitu ni chunga season khar turin Bagan lakah point hlawhchhuah a tawk a, Bagan hian hnehna lo chang ta se, an point hmuh zat a inang ang - hetah hian head-to-head goal difference en a ṭul dawn a, an intawn hmasaka 2-1 a lo tlawm tawh Bagan tan 2-0 tala chak a ngai tihna a ni.

Nizana Blasters leh Goa inkhel result kan hre hman lo a, Kerala club hi chak pawh ni se palina aia sang an ni thei tawh lo a, pahnihna Hyderabad pawh pakhatna ni thei tawh lo mah se Bagan result a zirin pathumnaa tla thla thei an ni.