Mohammedan khingpui tur Sreenidi

Vawiin tlai dar 2:00 hian I League hmahruaitu Mohammedan leh Sreenidi Deccan te an inhmachhawn dawn. Kolkata club Mohammedan-ah Mizo panga an awm a, chung zinga pathum Zothanmawia, Lalramchullova leh Brandon VL Remdika ten hmun pawimawh an chang.

Sreenidi Deccan-ah hian Mizo pali Lalromawia, C. Lalchungnunga, Vanlalbiaa Chhangte leh MC Malsawmzuala te an awm. Vizag, Andhra Pradesh-a innghat club hian an match hnuhnung berah Trau 3-1 in an sawp.

Samlukhai tlangval Romawia hi kerek hliam vangin a la inlan theih a rinawm lo a, Durtlang tlangval chak ṭha Chungnunga'n tlarhnung bul a ṭan nawn ang. Mabiaa leh MC-a te pawh lut thei dinhmunah an ding.

Vawiin inkhel dangah Gokulam Kerala leh Real Kashmir te tlai dar 4:30-ah an inkhel ang a, zan dar 7:30-ah Manipur derby a awm dawn - Trau leh Neroca te an inhmachhawn ang.

Tun season I League-ah hian vawi khat ṭheuh an inkhel chhuak ang a, hemi zawh hian a sang pasarihin champion tur an zawng zui ang. A hnuai lama awm parukin relegate tur an zawng dawn.

Mizo club Aizawl FC hi match hmasa pahnihah an chak loh avangin table mawngphahah an awm mek. Season liam ta khan champion tur zawng zingah an tel pha tawh lo a, tun season-a chanchin ṭha zawk nei turin insiam ṭhat an mamawh hle.