Nice lakah PSG an tlawm

Paris St-Germain chu Nice khelmualah 1-0 in an tlawm a, an player pawimawh Kylian Mbappe inlan theih loh niah Paris club hi goal hmaah an hriam tawk lo. Ligue 1 season kal laia vawi thum an tlawmna a ni.

Inrinni zan Allianz Riviera-a inkhelah Nice tan Andy Delort chuan hun tawp hma minute hnih chauh awm tawhah goal awmchhun a khung. Mikhual PSG tan sut lehna hun a awm tawh lo a, an phu ang ngeiin Nice lamin point thum an hmu.

Mauricio Pochettino-a'n tun hnaia yellow card hmu hnem Mbappe chu hrem vangin a chawr thei lo. France international awm lo mah se Lionel Messi, Angel di Maria leh Neymar te a la intlartir thei.

Amaherawhchu, an hming hrawl viau mah se an che fuh thei tlat lo, target zawnah shot vawi hnih chiah an nei thei. Poch-a enkawl team hian goal khung an harsat thei angreng hle a, an khingpui apiang an khel tawk em em deuh vek zel.

PSG manager Pochettino chuan, "Inkhel thunun tak chung siin kan chak lo, a pawimawh lai taka goal kan khung thei lo kha a pawi zual. Hun tawp dawnah goal kan la chuah zui, a rang thei ang bera insiamṭhat nghal kan ngai ang.

"Real Madrid nen Champions League kan khel zui dawn, tah chuan thil danglam kan hmuh ka beisei, tun ṭuma kan match khelh nen chuan khaikhin chi a ni dawn lo," tiin UCL atan chuan a la inringtawk hle.

Chak lo mah se PSG hian Ligue 1-ah chuan point 13 zetin hma an la hruai fal, an champion ngei a rinawm. Nilaini zanah Spanish club lian Real Madrid an hmachhawn leh dawn, an intawn hmasakah 1-0 a an chak avangin quarterfinal lut turin goal chhuah loh a tawk.