A chung berah Inter Milan

Serie A champion lai Inter Milan chun khelh zat inangah hma an hruai. Simone Inzaghi naute hian a mawngphah Salernitana chu 5-0 a sawp chungin table chung berah an lawn a, nomawi humhim turin an dinhmun a la ṭha.

Zirtawpni zan San Siro-a inkhelah Inter tan Lautaro Martinez-a'n hattrick a siam a, striker palian Edin Dzeko chuan goal hnih dang a khung ve bawk. Argentine striker Martinez tan kumina a goal hmasa a ni a, khung chhunzawm a tum ang.

Inter coach Simone Inzaghi chuan, "Player zawng zawng an khel ṭha vek, a bik takin Lautaro ka lawmpui. Kuminah khel ṭha viau mah se goal a khung mai lo, tunah chuan a hna pangngai a thawk chhunzawm leh nghal ang tih ka ring," a ti.

Nizan khan pahnihna Napoli leh AC Milan an inkhel a, a chak zawk chuan Inter hi tlan pelin hma an hruai ang. Amaherawhchu, match 27 ṭheuh an khelh chinah chuan Inter hi point khatin an chungnung.

Inrinni zan khan AS Roma an inlan a, striker Tammy Abraham-a goal khat hmangin Atalanta 1-0 in an hneh. England international hian tun season inelna hrang hrangah goal 20 a khung tling ta, league bikah goal 13 a khungna a ni chiah bawk.

Hrem vangin Jose Mourinho-a'n a hmunah a naute a la kaihruai thei lo. Portuguese manager hian a naute a kaihhruai theih lohna match pahnihah an chak ve ve. An match lehpekah chuan bench-ah a ṭhu thei tawh ang.

Roma defender Gianluca Mancini chuan, "Mourinho hnen aṭangin kan thawh ṭhat avanga lawmthu hrilhna kan dawng, ani chuan match kan khelh leh turah pawh technical area aṭanga ho kher kan ngaih loh thu min hrilh bawk," tiin an manager-in fiamthu a thawh zui thu a sawi.