Germany-in Spain lakah si ruk an phur

Nations League finals khelh tuma a siruk laa thawk chhuak Spain-in Germany chu si ruk an phurh a, 6-0 in an sawp.

Sevilla khawpuia Thawhleh zana inkhelah Spain-in Germany lakah goal ruk an khung a, Joachim Low hoten an chhanletna an nei lo. La Roja-in Nations League finals an khel dawn a, Die Mannschaft erawh an tlu sawp thung.

Spain tan Manchester City forward Ferran Torres-a'n hattrick a siam a, Alvaro Morata, Rodri leh Mikel Oyarzabal ten goal khat ṭheuh an khung. German keeper Manuel Neuer chu khel ṭhaa sawi theih a ni a, hei hian Low-a kaihhruai Germany team a sawifiah.

Germany-in League A group 4-a hmahruaitu ni turin point khat an mamawh a, Joachim Low erawhin chak tumin Spain an pan thu a sawi thung. Spain hmachhawntu zingah hian 2014 World Cup final-a bul ṭantu chu keeper Neuer leh midfielder Kroos chiah an awm.

Low-a'n player 11 a thlan-chhuahte chu Neuer; Matthias Ginter, Niklas Sule, Robin Koch, Philipp Max; Leon Goretzka, Ilkay Gundogan, Kroos; Leroy Sane, Timo Werner leh Serge Gnabry te an ni. 

Spain pawh 2010 World Cup-a an champion ṭum nen squad a inthlau ta hle. Captain Sergio Ramos chiah La Roja ropui laia khelpha a awm tawh a, Germany hmachhawn tura inlante chu Unai Simon; Sergi Roberto, Pau Torres, Ramos, Jose Gaya; Koke, Rodri, Sergio Canales; Dani Olmo, Alvaro Morata leh Ferran Torres te an ni.

Luis Enrique-a'n keeper De Gea aiah Unai Simon a hmang nawn a, player lut aṭanga teh mai chuan mikhual Germany aia an ṭhatna bik a awm lo. Low ang thoin Enrique-a'n player beiseiawm a hmang nasa hle.

Spain-in minute 12-na lekah inhliam vangin Sergio Canales an thlak a ṭul a, amaherawhchu he susbsitution hi vanneina a ni. Canales aia lut Napoli midfielder Fabian a khel ropui a, goal ruk an khung zinga goal thum chu a siamsak a ni.

La Roja hian minute 17-na lekah Morata hmangin an khung a, hemi hnu hi chuan a khat mawi tawkin goal an khung. German player-te Spain ball in pass an thlir a, Joachim Low leh Germany vanneihna erawh au el tu tur mipui an awm lo.

Spain hian kawng tinrengin inkhel an thunun. La Roja hian 70% ball possession an nei a, vawi 23 shot neiin goal zawnah vawi 10 an pet. Germany erawhin vawi hnih chiah shot an nei a, goal zawnah an pet lo! La Roja hian vawi 760 ball an an in pass kual a, Germany erawhin vawi 297 chauh an in pass. 

Kum ruk liam ta khan Germany-in football ram ropui bera sawi theih Brazil chu Belo Horizonte-ah 7-1 in an sawp a, tun ṭumah hian zahna leh mualphona chu an tawng baw ve ta thung. Joachim Low leh a hote thil tawn hi thua sawifiah chi a ni lo a, Germany football team chauh ni loin German mipui tana zahthlak a tling.

Low chuan, "Ukraine kan hneh zawha hma kan sawn tawh viaua kan inngai kha kan chhut sual a ni. Thil thlen dan hi ka hrethiam bik lo a, player-te erawh ka la ringtawk hle," tiin player-te a rin thu a sawi a, player leh mipuiin an ring lêt ang em tih erawh zawhna a awm thung.

Spain coach Luis Enrique chuan, "Hetiang zan hi football khawvelah chuan a thleng meuh lo. Engkim kha a bu ang thlap a ni a, ṭan phat aṭang khan a dik vel vek a ni. Kan team hian theihna kan nei a, kan rilru put hmang a dik bawk chuan thil ropui hi a a thleng thei a ni," tiin an khelh danah a lungawi hle.

Spain tana hattrick siamtu Ferran Torres chuan, "Ram tana hattrick siam hi player zawng zawngin an châk vek ang. Inkhel pawimawh leh team ṭha bik hmachhawn ṭuma goal thum khung hi a hlu a, ka lawm takzet," tiin a sawi.