MPL semifinal khelh tum boruak a sang ; Ramhlun North lakah Chanmari an chesual

Mc Dowell's No. 1 Soda Mizoram Premier League Season 7-ah nimin khan Chanmari FC leh Ramhlun North chu 2-2 in an inhnehtawk a, round 12 inkhel dang a hmuhnawm zui ang.

Vawiin tlai dar 2:30 hian Mizoram Police leh Bethlehem Vengthlang an inkhel ang a, zan dar 7:00 ah Chhinga Veng leh Chawnpui FC an inkhel ang. Police leh Chawnpui hian semifinal khelh beiseina sang tak an la nei a ni.

Inkhel hmuhnawm
Mak takin Ramhlun North-in first half an thunun a, Jessy Vanlalmuana'n crossbar a tihper hnuah goal hmahruai an khung. Minute 24-naah Laldingngheta corner chu Lalnunmawia'n a tauh lut.

Chanmari an insiam ṭha thei lo a, minute 43-naah Jessy-a'n Ramhlun North goal hnihna a khung. Chawngthansanga a hlauthawng tih a lang a, first half-ah player pahnih a thlak hman.

Second half-ah inkhel kal hmang a dang a, Chanmariin minute 57-na leka Laldampuia hmanga goal an khung avangin Ramhlun North an buai.

Substitute Lalnunzama a rawn che ṭha bawk a, minute 71-naah siphurh sutna goal ṭha zetin a tauh lut. Zama hian tun season-a a goal rukna a khung a, amaherawhchu a goal sarihna khung tur erawh keeper Eddie Zorammawia'n a dan sak.

Ramhlun North-in goal hnih khung siin chak lo thei dinhmunah an ding a, chutihrualin offside vangin an goal hnih khung pawm sak an ni lo a, an vanduai tia chhal theih a ni.

Semifinal-ah Police?
Mizoram Police-in vawiinah squad kimin table mawngphaha awm Bethlehem Vengthlang an hmachhawn dawn.

Police hian nimin khan training an nei a, midfielder H. Lalbiaktluanga an neih belh dawn a; Malsawmfela, F. Lalrinpuia leh Lalfakzuala te chawm tura R. Malsawmtluanga a awm dawn avangin vawiin tlai inkhelah goal a lut lo a nih chuan thil mak a ni ang.

Chutihrualin BVT hian match hnuhnung pahnihah Electric Veng leh Chawnpui an hneh a, an phur vanglai a nih avangin awlsam taka hneh an harsa ang.

Police hian hnehna an chang a nih chuan semifinal an hnaih dawn a, BVT tan pawh chak chuan table mawngphah chhuahsan theihna hun ṭha a ni ang.

Chawnpui tan fiahna
Chawnpui FC-in semifinal beiseina an neih san lai takin Bethlehem Vengthlang an hneh lo, semifinal khel tlak an nih chuan zanin hian Chhinga Veng an hneh a ngai a, fiahna hautak an hmachhawn dawn a ni.

Champion lai Chhingcows-in semifinal an lut tawh a, chuvangin player dam chiang lo defender PC Laldinpuia an luhtir kher a ṭul lo ang.

Chutih rualin Chhinga Veng hian Chawnpui hlahthlemna rilru an pu dawn tihna a ni lo a, semifinal kalkawng dal an tum vang ni loin champion zia an neih vang zawkin hnehna chan an tum dawn a ni.