Tlawm duh lo United an ni leh ta!

Manchester United-in Turin khawpuiah Italian champion Juventus chu 2-1 in an hneh a, Jose Mourinho hoten chak turin vanneihna an mamawh a, chutihrualin point thum hlawh chhuak tur hian hun tawp hma thlengin chak duhna thinlung an pu thung.

UEFA Champions League group stage paltlang turin United-in Juve an hneh a pawimawh a, Thawhlehni zan inkhelah hian Italian champion-in Cristiano Ronaldo hmangin goal an khung hmasa. Hun tawp hma minute li chhungin substitute Juan Mata leh Alex Sandro-a'n an lama an tihluh zarah Mourinho hote an chak.

Group H inkhel dangah Valencia-in an mualah Young Boys chu 3-1 in an hneh a, Swiss team tan knockout stage beisei theih a ni tawh lo a, Spanish club erawhin United an tibuai pha ang.

Juve Show

Old Trafford-ah inkhel thunun chungin Juventus-in hnehna an chang a, an chakna zat erawh goal khat chauh a ni. Turin-ah pawh Juve bawk an chungung a, hun chanve hmalamah Sami Khedira chuan goal ban pet perin second half-ah Paulo Dybala-a'n crossbar a pet per bawk.

Hei chauh hi a ni lo, Juventus-in inkhel an thunun dan thlir chuan first half-ah ringawt pawh goal thum tal khung thei tur an ni. Amaherawhchu goal hmaah an hriam tawk loh avangin minute 65-naah Cristiano Ronaldo hmangin goal hmahruai an khung chauh.

Ronaldo-a'n Juventus kawr haa Champions League-a a goal hmasa ber hi goal ropui a ni a, Leonardo Bonucci ball vawrh luh chu leia a tlak ruala pet nghalin David de Gea tan dan theih a ni lo. Portuguese forward hian minute 453 chhung UCL-a goal a khung loh hnua a goal hmasa ber a nih avangin a goal khung zawha a chet danah a pawh a lawm tih a lang.

Mourinho thluak

Jose Mourinho-a'n danglamna thlen turin Romelu Lukaku inhliam vanga bul ṭan Alexis Sanchez aiah Marouane Fellaini chu bench aṭangin a luhtir a, Chilean forward hian khelmuala a awm chhungin goal nawr aiin goal venhim hna a thawk nasa zawk. Belgian midfielder hi ball kanga a ṭhat avangin danglamna thlentu a ni.

Minute 86-naah subsitute dang Juan Mata chuan freekick aṭangin a khung a, minute thum hnuah Ashley Young freekick pet chu buai nuaih nuaih karah Juventus defender Alex Sandro-a'n an lamah a tilut bawk. Amaherawchu bench aṭanga player lut zinga mi Marcus Rashford erawhin hun tawpah keeper Wojciech Szczesny chiah a hmachhawn hnuah a paltlang thei lo.

Tlawm duh lo

Manchester United tan chanchin lawmawm chu tun dinhmuna English club ṭha ber Manchester City an hmachhawn hmaa Italy-a roreltu Juventus an hneh dan hi a ni. United hi match hnuhnung paruka match liah ropui takin an comeback a, tun hmaa Sir Alex Ferguson hnuaia an neih ṭhin angin hun tawp thlengin huaisen takin an bei a, anmahni

ṭantute pawhin an thlawp ṭha tawh bawk.

Manchester United manager Jose Mourinho chuan, "Juventus chu point khat leh point thum hmuh kha an tan a pawimawh pha lo. Kan tan chuan point thum kha a hlu takzet a, chu bakah khualmualah team ṭha tak kan hneh a, kan rilru put hmang sawhngheh nan a pawimawh. Kan khingpui khan tun season-ah chak loh an la nei lo a, Champions League-ah goal an la chhuah lo a, chutianga team ṭha lakah chuan indah hniamna kan nei lo," tiin a naute khelh dan a fak.

Sim harsa, ze ngai

Mourinho hian inkhelh banah Juventus ṭantu lam hawiin a beng a dawh vah a, a chet dan sawiseltu leh demtu thlengin an awm. Portuguese manager hian tun hmain Italian club Inter Milan a enkawl tawh ṭhin avangin Juve ṭantuten an au el a, hemi chhanletna atana a tih hi a ni.

Hemi chungchang hi sawiin Mourinho chuan, "Minute 90 chhung min tih el a, kei chuan ka ti let lo, eng emaw ka lantir ve mai chauh a ni. Ka chet dan avangin Inter Milan ṭantu mipui engemaw zat chu an lawm ang mah se kei chuan Juventus, player leh manager te ka zah a, an theihna hi ka dahsang bawk," tiin a sawi.

Juventus manager Massimiliano Allegri chuan, "Mitinin ze hrang ṭheuh kan nei a, a dik leh dik lo thliar thei ka ni lo," tiin football pawn buainaah inrawlh a tum lo.

Engtin zel?

Juventus hian November 27 zanah Valencia an mikhual dawn a, Manchester United hian hemi zan vek hian Young Boys an mikhual dawn bawk.

United leh an hnuai chiaha awm Valencia te hi group match hnuhnung berah an inhmachhawn dawn a, Italian club-in Spanish club hi an hneh sak a nih chuan Mourinho hote hmabak a awlsam sawt ang.