Low dinhmun a derthawng

Germany-in 2006 FIFA World Cup zawh aṭangin Joachim Low hi head coach ni turin an chhawr ṭan a, record pawh a nei ṭha hle. World Cup 2010-ah pathumna a nih pui a, kum li hnuah nomawi a chawi. Hei chauh hi ni lo, Euro 2008-ah final an lut a, Euro 2012 leh 2016-ah semifinal an thleng bawk.

Amaherawhchu khawvela ṭha ber nih duh Germany hian nomawi an duh a, semifinal hi lungawina tham a tling lo. World Cup nomawi an chawi zawhah 2017 FIFA Confederations Cup chawi leh mah se he inelna hi chhuanpui tham a ni lo. Inlena ngaihhlut ber World Cup hnuhnung berah group mawng phah niin an tla nghal a, Low dinhmun a derthawng.

Low-a'n Germany siam ṭhat tumin player langsar Thomas Muller, Jerome Boateng leh Mats Hummels a koh tawh lo tur thu a puang rup a, result erawh a ṭhat phah hran lo. Germany hian Nations League season khatnaah chak an nei lo a, season hnihnaah vawi hnih chak mah se Ukraine chauh an hneh.

Arsenal leh Germany in an hnawl Mesut Ozil-a'n twitter lamah, "Jerome Boateng koh let a ṭul," tiin a ziak a, Real Madrid midfielder hlui ṭawmpuitu an tam. Bayern Munich defender Boateng leh Borussia Dortmund defender Hummels te tel lohna Germany tlarhnung ding hi Premier League kai thar Leeds United player Robin Koch te a ni mai a; player dang Ginter, Niklas Sule, Robin Koch leh Philipp Max te pawh ni se Boateng leh Hummels te aia thlan zawkna chhan tur a awm lo.

Germany ṭantuten Thomas Muller an koh loh chhan hi an la hrethiam thei lo bawk. Muller-a'n hmun pawimawh a channa Bayern Munich-in Spain club lian Barcelona 8-2 in an sawp. National team director Oliver Bierhoff chuan Low-a'n Germany a enkawl chhunzawm tur thu a sawi a, a player thlan dan erawh a dan a rinawm thung.

Bierhoff chuan, "Spain nena kan inkhel hian kan ngaihdan a thlak danglam lo. Joachim Low hi kan la ring a, nakkuma Euro khelh turah ṭha thei ang bera khelh kan duh," tiin a sawi a, Low chhuak tawh se titute tan chuan hriat nuam a ni lo ang.