Zobawkah Baby League

Lunglei District Football Association buatsaih LDFA Baby League (Zobawk Area) chu Zobawk playground-ah khelh ṭan a ni tawh a, naupang kum 4-13 inelna hi Lungleiah hmun hnihah kalpui tura ruahman niin Zobawk bakah Ṭhuamluaia Mualah neih tura ruahman a ni.

Zobawk bikah hian kum hniha inthlau chin hlawm khata ṭhen (dual age category) kalpui niin U-13, U-11 leh U-9 ten puitlingin football league an khel ang hian league system in an khel a, category tinah team pariat zel awmin avaiin team 24 an tel.

Zobawk Area Baby League-ah hian Zobawk vengchhung - Zobawk Bazar, Venghlun, Vengthar, Venglai bakah Theiriat, Hrangchalkawn, Dawn leh Lungpuizawl te an tel a ni.

Nilainia hawnna hun hin LDFA hruaitu Lawmkima Hmar chuan a hman pui, Lawmkima chuan, "AIFF-in awmze neia football a naupang ṭhanlen a ngai pawimawh a, kum dik a ngai pawimawh hle bawk. Naupang ten hma taka inelna rilru pu-a football an khel thei ta chu a lawmawm hle," a ti. Lungleia football academy pakhat bak a awm loh laia kuminah panga lai a awm belh ta leh, Age Group Festival, High School-College Tournament bakah hmeichhe tana inelna a awm lehzel chu hmasawnna ropui tak a nih thu a sawi bawk.

November 10, Inrinni hian Baby League hi khelh chhunzawm a ni dawn a, nakkum January 31 a khelh zawh tura ruahman a ni. Category tina champion hian Rs. 8,000 an dawng dawn a, pahnihnain Rs. 6,000, pathumna Rs. 4,000 a nih dawn bakah; team dang zawngin Rs. 3,000 ṭheuh an dawng dawn.