English football harhna thlentu Sancho?

England-in sawisel a hlawh ṭhinna pakhat chu English player-ten ram pawnah football khelh an tum lo a, Premier League-ah sum a tam bawk si avangin chona dang hmachhawn turin chhuah an harsat, tih hi a ni.

A bik takin rawlthar rual player zingah ram pawna kal an awm meuh lo a, hei hian thui takin England football hma hunah nghawng a neia ngaih a ni. Mahse, tun hnaiah English rawlthar ten ram pawn pan an intih 'hmuh' ṭan a, chung zinga hming langsar ber chu Jadon Sancho a ni.

Borussia Dortmund rawlthar duhawm hian tun season-ah club tan match 15 khel tawhin goal nga a khung a, assist vawi riat a nei bawk - kum 18 mi hi tunah chuan England tana inlan turin koh a ni tawh.

Reiss Nelson

Hoffenheim-ah rawlthar duhawm 'Nelson' tih in lo hmu a nih chuan Arsenal player a ni a, Germany-ah loan-in a khel mek tih lo hre ru! Kum 18 mi forward hian German club tan league match ruk a khelhah goal nga a khung tling der tawh a, Bundesliga-a a goal hmasa ber khung turin minute 14 bak a mamawh lo!

Kum 20 hnuai lam mi, Bundesliga-a season khata Nelson aia khung tam thei hi pakhat chiah an la awm a, chu chu Dortmund tana khel ṭhin, Barcelona forward ni ta Ousmane Dembele (6 goals) a ni - Nelson hian a khum ngei dawn niin a lang.

Keanan Bennetts

Kum 19 mi Borussia Monchengladbach winger Keanan hi Real Madrid winger Gareth Bale nen an khelh dan a in ang em avangin khaikhin an hlawh der tawh a, England fan-te chil tiputtu a ni.

Mahse - England, Germany leh Nigeria tan a khel thei vek a, Three Lions aiin Germany a thlang ang em, tih chu zawhna lian tak a ni mek.

Mandela Egbo

Kum 17 mi lek a nih laiin Crystal Palace youth team a chhuahsan a, Borussia Monchengladbach a zawm - kum 21 a ni tawh a, February khan Bundesliga-ah a vawi khat nan a

inlan ṭan.

Egbo chuan, "Team ṭha tak tan ka khel a, khelhna hun ka chan bawk si avangin a nuam em em a ni," tiin English club-te aiin German club-ah kum naupang tan hmun a tam zawk thu a sawi.

Jonathan Panzo

Chelsea academy aṭanga in zir chhuak rawlthar duhawm hian July khan France lam hawiin Monaco a pan a, tun dinhmunah chuan reserve team-ah awmin a khel ṭha ṭhin hle.

October-a kum 18 tling ve chauh defender hi Juventus, Borussia Monchengladbach leh Valencia pawhin an hel mek a, hei hi a chhiat loh zia pholangtu a ni.

Noni Madueke

Kum 16 mi chauh a la ni a, Tottenham Hotspur leh Manchester United-in professional contract an zawrh chu hnawlin Netherlands a pan daih!

Kum 15 mi lek nichunga Spurs Under 18 tana inlan thei Noni chuan, "England aṭanga Netherlands pan hi hma ka sawn zel nana ṭha berah kan ngai a ni," tiin England a chhuahsan chhan a sawi.