Mizoram leh Punjab inhnehtawk

Subroto Cup Boys U-17 khelh mekah nimin zing khan Mizoram leh Punjab chu 1-1 in an inhnehtawk. Mizoram tan Lalawmpuia chuan minute 14-na lekah khung mah se, penalty aṭanga goal an chhuah leh avangin an chak zo lo.

Mizoram tan coach R. Lalmuankima kaihhruaina hnuaiah SYS Football Academy, Lunglei an feh chhuak a, an khingpui Punjab tan I-League cham-pion lai Minerva Football Academy an inlan thung.

Mizoram hi Group H-ah Punjab, West Bengal, Gujarat leh Indonesia te nen an awm khawm a, group tina a sang ber chauhin quarterfinal an lut ang. Subroto Cup vawi 59-naah hian ram dang aṭanga tel an awm nual, Bangladesh aṭangin team hnih telin Afghanistan, Nepal leh Indonesia aṭangin team khat ṭheuh an tel bawk.

November 11 hian Mizoramin an match hnihna atan West Bengal an hmachhawn dawn a, November 12-ah Indonesia nen inkhel lehin group match hnuhnung ber atan November 13 hian Gujarat nen an hmachhawn leh ang.

Mizoram Squad
# Player Khua/Veng
1 Lalramchhana Lunglei
2 C. Vanlalruata Lunglei
3 Jonathan Lalpekhlua Lunglei
4 Joseph Lalmuanawma Vaseikai
5 Lallianmawia Hnahthial
6 Laldanmawia Ramlaitui
7 C. Lalmuanpuia Lungrang
8 M. Lalpektluanga Lunglei
9 Lalawmpuia Chawngte ‘C’
10 Letminlun Singson Kolasib
11 T. Malsawmzuala Lunglei
12 Aron Vanlalrinchhana Cherhlun
13 F. Lalbiaknunga Serkawn
14 Zosangliana Zohnuai
15 R.Vanlalmalsawma Zotlang
16 Laldinpuia Rahsiveng